കുന്നംകുളം: തൃശൂർ സ്‌പോർട്‌സ് ഡിവിഷനു കീഴിലുള്ള കുന്നംകുളം സ്‌പോർട്‌സ് ഡിവിഷന്റെ ഉദ്ഘാടനം ഈ മാസം 23 ന് രാവിലെ 11ന് മണിക്ക് കായിക വകുപ്പ് മന്ത്രി വി. അബ്ദുറഹിമാൻ ഇൻഡോർ സ്റ്റേഡിയത്തിൽ നിർവഹിക്കും. ഉദ്ഘാടനത്തോടനുബന്ധിച്ച് നഗരസഭാ ചെയർപേഴ്‌സൺ സീതാ രവീന്ദ്രന്റെ അദ്ധ്യക്ഷതയിൽ സംഘാടക സമിതി രൂപീകരണ യോഗം നടന്നു. സ്‌പോർട്‌സ് കൗൺസിലിന് കീഴിലുള്ള പ്രാക്ടീസ് ഗ്രൗണ്ടിന്റെ നിർമ്മാണ ഉദ്ഘാടനവും ഇതോടനുബന്ധിച്ച് നടത്താൻ യോഗത്തിൽ തീരുമാനമായി. രക്ഷാധികാരികളായി എ.സി. മൊയ്തീൻ എം.എൽ.എ, രമ്യ ഹരിദാസ് എം.പി എന്നിവരെ തിരഞ്ഞെടുത്തു. സംഘാടക സമിതി ചെയർപേഴ്‌സണായി സീതാ രവീന്ദ്രനെയും ജനറൽ കൺവീനറായി തൃശൂർ സ്‌പോർട്‌സ് കൗൺസിൽ സെക്രട്ടറിയെയും തീരുമാനിച്ചു.13 അംഗ വൈസ് ചെയർമാന്മാർ, അഞ്ചംഗ കൺവീനർമാർ , 22 അംഗ എക്‌സിക്യൂട്ടീവ് അംഗങ്ങൾ എന്നിവരെ യോഗം തിരഞ്ഞെടുത്തു. ചടങ്ങിൽ മുൻ കായികതാരങ്ങളെ ആദരിക്കാനും കായിക പ്രദർശന മത്സരങ്ങൾ സംഘടിപ്പിക്കാനും തീരുമാനിച്ചു. യോഗത്തിൽ എ.സി. മൊയ്തീൻ എം.എൽ.എ, ചൊവ്വന്നൂർ ബ്ലോക്ക് പഞ്ചായത്ത് പ്രസിഡന്റ് ആൻസി വില്യംസ്, ഡിവിഷൻ കായിക വിഭാഗം ഡെപ്യൂട്ടി ഡയറക്ടർ മെൽവിൻ ജോസഫ്, കായികാദ്ധ്യാപകൻ ശ്രീനേഷ് തുടങ്ങിയവർ പങ്കെടുത്തു

സ്‌പോർട്‌സ് ഡിവിഷൻ ബോയ്‌സ് സ്‌കൂൾ കേന്ദ്രമാക്കി
കുന്നംകുളം ഗവ. വൊക്കേഷണൽ ബോയ്‌സ് ഹയർസെക്കൻഡറി സ്‌കൂൾ കേന്ദ്രമാക്കി പ്രവർത്തിക്കുന്ന സ്‌പോർട്‌സ് ഡിവിഷനിൽ 43 വിദ്യാർത്ഥികളാണുള്ളത്. ഏഴാം ക്ലാസിൽ ഇരുപതും എട്ടാം ക്ലാസിൽ 23 വിദ്യാർത്ഥികളും ഉൾക്കൊള്ളുന്നതാണ് പ്രഥമ ഡിവിഷൻ. അത്‌ലറ്റിക്‌സ്, ഫുട്ബാൾ, ജൂഡോ, ബോക്‌സിംഗ് എന്നിവയാണ് സ്‌പോർട്‌സ് ഡിവിഷനിലുള്ള കായിക ഇനങ്ങൾ. കുട്ടികൾക്ക് താത്ക്കാലികമായി താമസിക്കാനാവശ്യമായ സൗകര്യങ്ങൾ ഇൻഡോർ സ്റ്റേഡിയത്തിനടുത്ത് പന്ത്രണ്ട് മുറികൾ സജ്ജമാക്കിയിട്ടുണ്ട്. സുഭിക്ഷ കേരളം കാന്റീൻ വഴിയാണ് വിദ്യാർത്ഥികൾക്കുള്ള ഭക്ഷണം ഏർപ്പെടുത്തിയിട്ടുള്ളത്.