തൃശൂർ: വെയിലത്ത് ജോലി ചെയ്യുന്ന പൊലീസിന് ആശ്വാസമാകാൻ മുഖപടവും കൈയ്യുറയും സമ്മാനിച്ചു. ബൈക്ക് റൈഡറും നവമാദ്ധ്യമങ്ങളിലൂടെ ശ്രദ്ധേയനുമായ യൂട്യൂബർ ''മുർഷിദ് ബാൻഡിഡോസ്'' .ആണ് ജില്ലയിലെ അഞ്ഞൂറോളം പൊലീസുകാർക്ക് കൈയ്യുറയും മുഖപടവും നൽകിയത്. കണ്ണ് ഒഴികെ മുഖമെല്ലാം മറയ്ക്കുന്നതാണ് മുഖപടം. സിറ്റി കമ്മിഷണർ ആർ. ആദിത്യയുടെ ഓഫീസിലെത്തി വിതരണം ചെയ്യുന്ന ഉത്പ്പന്നത്തിന്റെ ഗുണനിലവാരം ബോദ്ധ്യപ്പെടുത്തിയ ശേഷം എ.സി.പി. വി.കെ. രാജുവിന് ആദ്യ ബോക്‌സ് നൽകിയാണ് വിതരണം ആരംഭിച്ചത്. തൃശൂർ നഗരം ചുറ്റി മുർഷിദും സംഘവും ചേർന്ന് ഡ്യൂട്ടിയിലുള്ള മുഴുവൻ പൊലീസുകാർക്കും നേരിട്ട് വിതരണം ചെയ്തു. പാവപ്പെട്ട കുട്ടികൾക്ക് പഠനോപകരണങ്ങളും ദരിദ്രരായവരുടെ വീടുകളിലേക്ക് പലചരക്ക് സാധനങ്ങളും നൽകിവരുന്നുണ്ടെന്നും വരുമാനത്തിന്റെ ഒരു ഭാഗം ഇത്തരം സേവനപ്രവർത്തനങ്ങൾക്കായി ഉപയോഗിക്കുമെന്നും മുർഷിദ് അറിയിച്ചു.