തിരുവനന്തപുരം: കുറഞ്ഞ ഫീസിൽ എം.എസ്.ഡബ്ളിയു (മാസ്​റ്റർ ഒഫ് സോഷ്യൽ വർക്ക്) പഠിക്കാൻ സംസ്കൃത സർവകലാശാല അവസരമൊരുക്കുന്നു. കാലടി മുഖ്യകേന്ദ്രത്തിലും വിവിധ പ്രാദേശിക കാമ്പസുകളിലും ഈ കോഴ്സുണ്ട്. സെമസ്​റ്റർ ഫീസ് 6500 രൂപ. രാജ്യത്തു തന്നെ ഏ​റ്റവും കുറഞ്ഞ ഫീസാണിതെന്ന് സർവകലാശാല അറിയിച്ചു. സ്‌കോളർഷിപ് സൗകര്യവും ലഭ്യമാണ്.

ഏതെങ്കിലും വിഷയത്തിൽ ബിരുദം (10+ 2+ 3 പാ​റ്റേൺ) നേടിയവർക്ക് അപേക്ഷിക്കാം. ബി. എ. പ്രോഗ്രാമിന്റെ ചോയ്സ് ബേസ്ഡ് ക്രെഡി​റ്റ് ആൻഡ് സെമസ്​റ്റർ സിസ്​റ്റം പ്രകാരം എല്ലാ കോഴ്സുകളും പൂർത്തിയായവർക്കും ഒന്ന് മുതൽ നാല് സെമസ്​റ്ററുകൾ വിജയിച്ച് (എട്ട് സെമസ്​റ്റർ പ്രോഗ്രാമിന് ഒന്ന് മുതൽ ആറ് സെമസ്​റ്ററുകൾ വിജയിച്ച്) 2022 ഏപ്രിൽ / മേയ് മാസങ്ങളിൽ അവസാന സെമസ്​റ്റർ പരീക്ഷ എഴുതുന്നവർക്കും ഫലം കാത്തിരിക്കുന്നവർക്കും അപേക്ഷിക്കാം. ഇവർ ഓഗസ്​റ്റ് 31ന് ന് മുൻപായി അവസാന വർഷ ഡിഗ്രി ഗ്രേഡ് ഷീ​റ്റ്, പ്രൊവിഷണൽ ഡിഗ്രി സർട്ടിഫിക്ക​റ്റ് എന്നിവ ഹാജരാക്കണം. സോഷ്യൽ വർക്ക് അഡ്മിഷൻ ടെസ്​റ്റ് വഴിയാണ് പ്രവേശനം. സോഷ്യൽ വർക്കിൽ ബിരുദം നേടിയവർക്ക് പ്രവേശന പരീക്ഷയുടെ മാർക്കിൽ 10 ശതമാനം വെയ്‌​റ്റേജ് ലഭിക്കും. പ്രവേശന പരീക്ഷകൾ മേയ് അഞ്ച് മുതൽ 11 വരെ, സർവകലാശാലയുടെ മുഖ്യക്യാമ്പസിലും പ്രാദേശിക കാമ്പസുകളിലും നടത്തും. മേയ് 21ന് റാങ്ക് ലിസ്​റ്റ് പ്രസിദ്ധീകരിക്കും.

അപേക്ഷിക്കേണ്ട അവസാന തീയതി ഏപ്രിൽ 22. പ്രവേശന പരീക്ഷ ഫീസ് ഓൺലൈനായി അടയ്ക്കാം. വിവരങ്ങൾക്കും ഓൺലൈനിൽ അപേക്ഷിക്കുന്നതിനും www.ssus.ac.in വെബ്സൈറ്റ് കാണുക.