തിരുവനന്തപുരം: ഇന്ത്യൻ സമൂഹത്തിലെ ജാതിബോധം ഇല്ലാതാക്കാൻ സാമൂഹികവിപ്ലവം ആവശ്യമാണെന്ന് മന്ത്രി കെ. രാധാകൃഷ്‌ണൻ പറഞ്ഞു. കേരള ഭാഷാ ഇൻസ്റ്റിറ്റ്യൂട്ട് പുനഃപ്രസിദ്ധീകരിക്കുന്ന അംബേദ്കർ സമ്പൂർണ കൃതികളുടെ ഒന്നാംവാല്യം പ്രകാശനം ചെയ്യുകയായിരുന്നു അദ്ദേഹം. ജാതിയുടെ പേരിൽ അടിച്ചമർത്തപ്പെട്ട ജനതയെ അവകാശബോധമുള്ളവരാക്കി മാറ്റാനാണ് അംബേദ്കർ ശ്രമിച്ചതെന്നും മന്ത്രി പറഞ്ഞു. വി.കെ. പ്രശാന്ത് എം.എൽ.എ പുസ്‌തകം ഏറ്റുവാങ്ങി.
അംബേദ്കർ കൃതികളുടെ വില്പനയിലൂടെ ലഭിക്കുന്ന ലാഭം പട്ടികജാതി പട്ടിക വർഗത്തിൽപ്പെടുന്ന ഗവേഷകർക്ക് പുസ്‌തകരചനയ്ക്കുള്ള ഫെലോഷിപ്പിനായി വിനിയോഗിക്കുമെന്ന് ചടങ്ങിൽ അദ്ധ്യക്ഷത വഹിച്ച ഭാഷാ ഇൻസ്റ്റിറ്റ്യൂട്ട് ഡയറക്ടർ ഡോ.പി.എസ്.ശ്രീകല പറഞ്ഞു. വൈലോപ്പിള്ളി സംസ്‌കൃതി ഭവൻ മിനി ഹാളിൽ നടന്ന ചടങ്ങിൽ വൈലോപ്പിള്ളി സംസ്‌കൃതി ഭവൻ വൈസ് ചെയർമാൻ ഡോ.ജി.എസ്. പ്രദീപ്, ഭാഷാ ഇൻസ്റ്റിറ്റ്യൂട്ട് വില്പന വിഭാഗം അസി.ഡയറക്ടർ ഡോ. ഷിബു ശ്രീധർ, റിസർച്ച് ഓഫീസർ കെ.ആർ. സരിതകുമാരി, വി. പദ്മനാഭൻ എന്നിവർ സംസാരിച്ചു. ഡോ. അംബേദ്കർ സമ്പൂർണ കൃതികളുടെ 40 വാല്യം പുനഃപ്രസിദ്ധീകരിക്കുന്നതിന്റെ ഭാഗമായാണ് വാല്യം ഒന്നിന്റെ പുതിയപതിപ്പ് പ്രകാശനം ചെയ്‌തത്. 300 രൂപയാണ് പുസ്‌തകത്തിന്റെ വില.