കല്ലമ്പലം: കല്ലമ്പലത്ത് തെരുവ് നായ്‌ക്കളുടെ ആക്രമണത്തിൽ 5 പേർക്ക് പരിക്ക്. കെ.ടി.സി.ടി ചെയർമാൻ പി.ജെ. നഹാസ്, പള്ളിക്കൽ സ്വദേശി ഇബ്രാഹിം, പുലിക്കുഴി സ്വദേശി അഖിൽ, കരവാരം സ്വദേശി സുനിത, പലവക്കോട് സ്വദേശി നാസർ എന്നിവർക്കാണ് പരിക്കേറ്റത്.

കഴിഞ്ഞ ഒരാഴ്ചയ്ക്കുള്ളിലാണ്‌ അഞ്ചുപേരും നായ്ക്കളുടെ ആക്രമണത്തിനിരയായത്. മൂന്ന് പേർക്ക് നേരിട്ട് നായയുടെ കടിയേൽക്കുകയും രണ്ട് പേർ വീണ് പരിക്കേൽക്കുകയുമായിരുന്നു.

പി.ജെ. നഹാസിന്റെ ഇടത് കാലിന്റെ ഉപ്പൂറ്റിയിലാണ് കടിയേറ്റത്. തിങ്കളാഴ്ച വൈകിട്ട് കല്ലമ്പലം പെട്രോൾ പമ്പിനു സമീപം വച്ചാണ് പിന്നിലൂടെ ഓടിവന്ന നായ കാലിൽ കടിച്ചത്. ആഴത്തിലുള്ള മുറിവായതിനാൽ ഉടൻ തന്നെ കെ.ടി.സി.ടി ആശുപത്രിയിൽ ചികിത്സ തേടി.

ഇബ്രാഹിമിനും, അഖിലിനും കല്ലമ്പലം പുല്ലൂർമുക്ക് റോഡിൽ വച്ച് ഞായറാഴ്ച പുലർച്ചെയാണ് തെരുവ് നായയുടെ കടിയേറ്റത്.

സ്കൂട്ടിയിൽ പോവുകയായിരുന്ന സുനിതയും ബൈക്കിൽ പോകുകയായിരുന്ന നാസറും കൂട്ടത്തോടെയുള്ള നായ്ക്കളുടെ ആക്രമണത്തിൽ നിന്ന് രക്ഷപ്പെടാൻ ശ്രമിക്കുന്നതിനിടെ വീണ് പരിക്കേൽക്കുകയായിരുന്നു. കരവാരം, നാവായിക്കുളം, ഒറ്റൂർ പഞ്ചായത്തുകളിലായി വ്യാപിച്ചുകിടക്കുന്ന കല്ലമ്പലത്ത് തെരുവ് നായ്ക്കളുടെ ശല്യം രൂക്ഷമാണെന്നും പഞ്ചായത്ത്‌ തലത്തിൽ നടപടിയുണ്ടാകണമെന്നും നാട്ടുകാർ ആവശ്യപ്പെട്ടു.