തിരുവനന്തപുരം: സംസ്ഥാനത്ത് ബുധനാഴ്ച വരെ ഒറ്റപ്പെട്ട ശക്തമായ മഴയ്ക്ക് സാദ്ധ്യതയുണ്ട്. തെക്ക് മദ്ധ്യ ജില്ലകളിലാണ് കൂടതൽ മഴ ലഭിക്കുക. തെക്കേ ഇന്ത്യക്ക് മുകളിലെ ന്യുനമർദ്ദ പാത്തിയും കിഴക്ക് പടിഞ്ഞാറൻ കാറ്റുകളുടെ ശക്തി വർദ്ധിച്ചതുമാണ് ഇപ്പോൾ മഴ ലഭിക്കാൻ കാരണം. വടക്കൻ ജില്ലകളിൽ ഒറ്റപ്പെട്ട മഴയാണ് ലഭിക്കുന്നതെങ്കിലും ശക്തമായ കാറ്റിന് സാദ്ധ്യതയുണ്ട്. മദ്ധ്യ തെക്കൻ ജില്ലകളിൽ മഴയോടൊപ്പം ശക്തമായ ഇടിമിന്നലിനും സാദ്ധ്യതയുണ്ട്. ഇന്ന് എറണാകുളം, മലപ്പുറം എന്നീ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ഇവിടങ്ങളിൽ 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കും. മേയ് നാലിന് തെക്കൻ ആൻഡമാൻ കടലിൽ പുതിയ ന്യൂനമർദ്ദത്തിനും സാദ്ധ്യതയുണ്ട്. ഇത് രൂപപ്പെട്ടാൽ മഴയുടെ ശക്തി വീണ്ടും കൂടുമെന്നും കാലാവസ്ഥാ വിദഗ്ദ്ധർ പറഞ്ഞു.