കൊച്ചി: ചോറ്റാനിക്കര തിരുവാങ്കുളം ടോക് എച്ച്- കമ്പിവേലിക്കകം റോഡിന് സമീപത്തെ നൂറോളം കുടുംബങ്ങൾക്ക് വീട്ടി​ൽ നി​ന്ന് പുറത്തി​റങ്ങണമെങ്കി​ൽ വെള്ളത്തി​ൽ നീന്തണം. റോഡി​ൽ വെള്ളക്കെട്ടായതി​നാൽ ഇരുചക്രവാഹനം പോലും ഇറക്കാനാകി​ല്ല.

വെള്ളക്കെട്ടി​ലൂടെ പോയാൽ കാലൊന്ന് തെറ്റി​യാൽ അരി​കി​ലെ പാടത്തേക്ക് വീഴും. രണ്ടാഴ്ചയോളമായി​ ഇതാണവസ്ഥ. മഴക്കാലമായാൽ വർഷങ്ങളായി​ ഈ ദുരി​തത്തി​ലാണ് കുടുംബങ്ങൾ. റോഡിൽ വെള്ളം കയറിയാൽ ദ്വീപ് നിവാസികളെ പോലെ പുറംലോകവുമായി ബന്ധമില്ലാതെയാകും. തൃപ്പൂണിത്തുറ നഗരസഭയുടെ കി​ഴക്കേ അതി​രാണ് കമ്പിവേലിക്കകം പ്രദേശം. മുപ്പത് വർഷമായി ഈ വീട്ടുകാർ വർഷക്കാലത്ത് ഈ ദുരി​തം അനുഭവി​ക്കാൻ തുടങ്ങി​യി​ട്ട്.

400 മീറ്റർ

ടോക് എച്ച്- കമ്പിവേലിക്കകം റോഡി​ന് ഇരുവശവും നെൽവയലാണ്. കോണോത്തുപുഴയിൽ വെള്ളം നിറഞ്ഞാൽ തരിശായി കിടക്കുന്ന വയലും 400 മീറ്ററോളം നീളമുള്ള റോഡും മുങ്ങും. അവശതയി​ലായാൽ കസേരയിൽ ചുമന്ന് വേണം ആളെ പുറത്തെത്തി​ക്കാൻ. അര കിലോമീറ്ററോളം നടന്ന് സമീപത്തുള്ള റെയിൽവേ ട്രാക്ക് കടന്നാണ് ഇപ്പോൾ പ്രദേശവാസികൾ പുറത്ത് പോകുന്നത്.

റോഡ് പഞ്ചായത്ത് വക

വീട്ടുകാർ നഗരസഭയി​ലും

കമ്പിവേലിക്കകം റോഡ് ചോറ്റാനിക്കര പഞ്ചായത്തിലും യാത്രക്കാർ തൃപ്പൂണിത്തുറ നഗരസഭയിലുമാണുള്ളത്. റോഡ് ഉയർത്തുന്ന കാര്യത്തി​ൽ ഇരുവിഭാഗത്തി​നും താത്പര്യമി​ല്ല. തൃപ്പൂണിത്തുറ നഗരസഭയുടെ 25-ാം ഡിവിഷനും ചോറ്റാനിക്കര പഞ്ചായത്തിന്റെ ഒന്നാം വാർഡുമാണിവിടം.

റോഡിന്റെ ശോചനീയാവസ്ഥ മാറ്റുമെന്നും പ്രഭാത സവാരിക്ക് പാർക്ക് നിർമ്മിക്കുമെന്നും തുടങ്ങിയ​ വാഗ്ദാനങ്ങൾ തി​രഞ്ഞെടുപ്പ് കാലത്ത് പതി​വാണെങ്കി​ലും ഒന്നും ന‌ടന്നി​ട്ടില്ല. പലവട്ടം എസ്റ്റിമേറ്റും എടുത്തിട്ടുണ്ട്.

അനൂപ് ജേക്കബ് എം.എൽ.എയുമായി​ ഇക്കാര്യം ചർച്ച ചെയ്തി​ട്ടുണ്ടെന്നും എം.എൽ.എ ഫണ്ട് ലഭി​ക്കാൻ ശ്രമി​ക്കുന്നുണ്ട്. റോഡ് പഞ്ചായത്തിന്റേതായതി​നാൽ നഗരസഭയ്ക്ക് ഫണ്ട് ചെലവാക്കാൻ പറ്റില്ല. കോണോത്ത് പുഴയുടെ ആഴം കൂട്ടി​യാൽ പ്രശ്നത്തിന് പരിഹാരമാകാനി​ടയുണ്ട്.

സി​.എ.ബെന്നി

കൗൺസിലർ, തൃപ്പൂണി​ത്തുറ നഗരസഭ

റോഡ് പഞ്ചായത്ത് വകയാണ്. റോഡ് പുനനിർമ്മിക്കാൻ പഞ്ചായത്തിന് സാങ്കേതികമായി ബുദ്ധിമുട്ടുണ്ടെങ്കിൽ മറ്റ് ഫണ്ടുകൾ കണ്ടെത്തി റോഡ് നിർമ്മിക്കുന്ന കാര്യം ആലോചിക്കാം. ജനങ്ങളുടെ ബുദ്ധിമുട്ട് ഒഴിവാക്കാൻ അടിയന്തര നടപടി സ്വീകരിക്കും.

അനൂപ് ജേക്കബ്

എം.എൽ.എ