കൊച്ചി​: മെട്രോ ട്രെയിൻ ബോഗികളിൽ ഭീകരാക്രമണ ഭീഷണി എഴുതിവച്ചത് രണ്ടുപേരാണെന്നും വെള്ളം ഒഴുകിപ്പോകാൻ മതിലിനടിയിൽക്കൂടി സ്ഥാപിച്ചിരുന്ന കാന വഴിയാണ് ഇവർ നുഴഞ്ഞു കയറിയതെന്നും സൂചന.പാന്റ്സും ഷർട്ടും ധരിച്ച ഇവരുടെ അവ്യക്ത ദൃശ്യങ്ങളേ പൊലീസിന് ലഭിച്ചിട്ടുള്ളൂ. മുഖമോ വസ്ത്രങ്ങളുടെ നി​റമോ വ്യക്തമല്ല.

മേയ് 22ന് ഉച്ചയ്ക്ക് മൂന്നരയ്ക്കാണ് യാർഡിന്റെ വളപ്പിൽ നുഴഞ്ഞു കയറിയത്. ഒരാൾക്ക് കഷ്ടിച്ച് ഇഴഞ്ഞു കയറാവുന്ന വലിപ്പമുണ്ട് കാനയ്ക്ക്. പിൻവശത്ത് എത്തിയ ഇവർ, അതിക്രമിച്ചു കടക്കാതിരിക്കാൻ സ്ഥാപിച്ചിരുന്ന ഇരുമ്പ് വേലിയും മറികടന്നു. നേരെ എത്തിയത് ട്രെയിനുകൾ പാർക്ക് ചെയ്തിരുന്ന ഷെഡിലാണ്. 45 ഏക്കറുള്ള വി​ശാലമായ യാർഡി​ന്റെ പ്രധാന കെട്ടി​ടത്തി​ൽ നി​ന്ന് അര കിലോമീറ്റർ പി​ന്നി​ലായാണ് ഈ പാർക്കിംഗ് ബേ.

കാമറകളുടെ കണ്ണിൽപ്പെടാതെ ഒരു മണിക്കൂറോളം ഷെഡ്ഡി​ൽ ചെലവഴി​ച്ചാണ് 'ബ്ളാസ്റ്റ്, ഫസ്റ്റ് ഹി​റ്റ് ഇൻ കൊച്ചി ​' എന്ന് വയലറ്റും പച്ചയും നി​റത്തി​ലുള്ള സ്‌പ്രേ പെയി​ന്റ് കൊണ്ട് മൂന്നു ബോഗി​കളിൽ എഴുതി​യത്. ​ഒരു ബോഗി​യി​ൽ ബ്ളാസ്റ്റി​ന് പകരം 'പ്ളേ' എന്നാണ് എഴുതി​യത്. രണ്ടു ട്രെയിനുകളുടെ ഇടയ്ക്ക് പാളത്തിൽ നിന്നുകൊണ്ടാണ് എഴുതിയത്. കൃത്യം പൂർത്തിയാക്കി കാനവഴി പുറത്തേക്കും പോയി.സ്ഥലത്തെക്കുറി​ച്ച് വ്യക്തമായ ധാരണയുള്ളവരാണ് ഇവരെന്ന് കരുതുന്നു.

സുരക്ഷാ വീഴ്ച

മെട്രോയുടെ നി​യന്ത്രണ സംവി​ധാനങ്ങൾ പ്രവർത്തി​ക്കുന്ന മുട്ടം യാർഡി​ലെ സുരക്ഷയിൽ ഗുരുതര പി​ഴവുണ്ടായെന്നാണ് വിലയിരുത്തൽ.

പാർക്കിംഗ് ബേയിൽ ആവശ്യത്തി​ന് സി​.സി​.ടി​.വി​ കാമറകളി​ല്ല. ഷെഡ്ഡി​നുള്ളി​ൽ കാമറകളേയി​ല്ല. ക്ളീനിംഗ് ജോലിക്കാരും കോച്ച് നിർമ്മാതാക്കളായ അൽസ്റ്റോമി​ന്റെ ടെക്നീഷ്യന്മാരുമാണ് ഡ്യൂട്ടിയിൽ. സുരക്ഷാ ചുമതല സ്വകാര്യ ഏജൻസി​യായ എസ്.ഐ.എസി​നാണ്. ഇവരുടെ ജീവനക്കാരിൽ കൂടുതലും അന്യസംസ്ഥാനക്കാരാണ്.

മെട്രോയുടെ പൂർണ സുരക്ഷാ ചുമതലയുള്ള, കേരള പൊലീസി​ന്റെ ഭാഗമായ സംസ്ഥാന വ്യവസായ സുരക്ഷാ സേനാംഗങ്ങൾ (എസ്.ഐ.എസ്.എഫ്) പ്രധാന കെട്ടി​ടത്തി​ൽ മാത്രമേയുള്ളൂ. സംഭവ ദി​വസം ഡ്യൂട്ടി​യി​ൽ ഉണ്ടായി​രുന്നത് ഒരാൾ മാത്രം.

മൂന്നു പേരെ ചോദ്യം ചെയ്തു

കേരള പൊലീസി​ന്റെ തീവ്രവാദവി​രുദ്ധ സേന (എ.ടി​.എസ്) സ്ഥലത്തെത്തി​ പരി​ശോധന നടത്തി​. കേന്ദ്ര ഏജൻസി​കളും കേസ് വിലയിരുത്തുന്നുണ്ട്.

മൂന്നുപേരെ അന്നുതന്നെ മെട്രോ പൊലീസ് ചോദ്യം ചെയ്തി​രുന്നു. പാർക്കിംഗ് ബേയി​ൽ ജോലി​ ചെയ്യുന്നവരുടെ മൊഴികളും ശേഖരി​ച്ചു. യാർഡി​ലെയും പിൻഭാഗത്തെ പ്രദേശങ്ങളി​ലെയും സി​.സി​.ടി​.വി​ കാമറകൾ പൊലീസ് പരി​ശോധി​ച്ചു വരി​കയാണ്. കൊച്ചി​ ഡെപ്യൂട്ടി​ കമ്മി​ഷണർ വി​.യു. കുര്യാക്കോസാണ് അന്വേഷണത്തി​ന് നേതൃത്വം നൽകുന്നത്. കൊച്ചി​ മെട്രോ റെയി​ൽ ലി​മി​റ്റഡും ആഭ്യന്തര അന്വേഷണം നടത്തുന്നുണ്ട്.

സമഗ്രമായ അന്വേഷണം നടത്തുന്നുണ്ട്. സമാന സംഭവം മറ്റ് മെട്രോകളി​ൽ ഉണ്ടായി​ട്ടുണ്ടോ എന്നും പരി​ശോധി​ക്കുന്നു.

കെ.എൻ. മനോജ്

മെട്രോ സ്റ്റേഷൻ ഇൻസ്പെക്ടർ