കട്ടപ്പന : സ്വകാര്യ ആശുപത്രി കേന്ദ്രീകരിച്ച് മോഷണം നടത്തിയ സ്ത്രീയെ കട്ടപ്പന പൊലീസ് അറസ്റ്റ് ചെയ്തു.കുഴിത്തൊളു കുഴിക്കണ്ടം പന്നയ്ക്കൽ സുശീല ( 47 ) ആണ് മോഷണം നടത്തി മണിക്കൂറുകൾക്കകം പിടിയിലായത്.ബുധനാഴ്ച്ച രാവിലെ 9 നാണ് സെന്റ് ജോൺസ് ആശുപത്രിയിൽ ചികിത്സയ്ക്കെത്തിയവരുടെ ഒപ്പമുണ്ടായിരുന്ന കുട്ടിയുടെ കൈയ്യിൽ കിടന്നിരുന്ന സ്വർണ്ണ വള മോഷ്ടിച്ച ശേഷം മുങ്ങിയത്. ആശുപത്രിയിൽ മുൻപുണ്ടായിരുന്ന മോഷണങ്ങളുടെ പശ്ചാത്തലത്തിൽ പ്രതിയെക്കുറിച്ച് ആശുപത്രിയിലെ സെക്യൂരിറ്റി ജീവനക്കാർക്ക് ഫോട്ടോ സഹിതം സൂചന നൽകിയിരുന്നു.ഇതിനിടെയാണ് ഇവർ വീണ്ടും മോഷണം നടത്തിയത്.ഈ സമയം ഇവരുടെ ചിത്രങ്ങൾ ഉൾപ്പടെ മോഷണം നടന്ന വിവരം സമൂഹ മാദ്ധ്യമങ്ങളിൽ പ്രചരിപ്പിക്കുകയും ചെയ്തിരുന്നു. ആശുപത്രിയിൽ നിന്നും രക്ഷപ്പെട്ട് നഗരത്തിൽ ഗാന്ധി സ്ക്വയറിൽ എത്തിയ പ്രതി സുശീല മറ്റൊരു കുട്ടിയെ റോഡ് മുറിച്ചു കടക്കാൻ സഹായിക്കുകയും ഈ കുട്ടിയുടെ കൈയ്യിൽ കിടന്നിരുന്ന വളകൾ മോഷ്ടിക്കുകയും ചെയ്തു. ഉച്ചയ്ക്ക് കുട്ടിയുടെ മാതാവ് പരാതിയുമായി സ്‌റ്റേഷനിൽ എത്തിയതോടെ പൊലീസ് ടൗണിൽ പരിശോധന നടത്തിയെങ്കിലും പ്രതിയെ കണ്ടെത്താനായില്ല.

തുടർന്ന് വിവിധ സി സി ടി വി ദൃശ്യങ്ങൾ പരിശോധിച്ചപ്പോഴാണ് ആശുപത്രിയിൽ മോഷണം നടത്തിയ അതേ ആൾ കട്ടപ്പനയിലെ സ്വകാര്യ ധനകാര്യ സ്ഥാപനത്തിൽ എത്തിയതായി വ്യക്തമായത്.പണയം വയ്ക്കാനായി നൽകിയ വിലാസത്തിൽ നിന്ന് പ്രതി സുശീലയെ തിരിച്ചറിഞ്ഞ പൊലീസ് ഉച്ചയ്ക്ക് 2 മണിയോടെ ഇവരുടെ വീട്ടിലെത്തിയാണ് കസ്റ്റഡിയിൽ എടുത്തത്. ഏപ്രിൽ 25 ന് ആശുപത്രിയിൽ നിന്നും 6 ഗ്രാം തൂക്കം വരുന്ന സ്വർണ്ണ വള സുശീല മോഷ്ടിച്ചിരുന്നു. ഈ കേസിൽ അന്വേഷണം നടന്നു വരികയായിരുന്നു. കഴിഞ്ഞ ജനുവരി 3 ന് ആശുപത്രിയിൽ എത്തിയ കുട്ടിയുമായി സൗഹൃദം സ്ഥാപിച്ച് ഒരു പവന്റെ ആഭരണം കവർന്നതും സുശീലയാണെന്ന് പൊലീസ് പറഞ്ഞു. സ്വർണ്ണാഭരണങ്ങൾ പണയംവച്ച ധനകാര്യ സ്ഥാപനങ്ങളിൽ പ്രതിയെ എത്തിച്ച് തെളിവെടുത്തു.കട്ടപ്പന ഡി വൈ. എസ് .പി വി . എ നിഷാദ്മോന്റെ നിർദ്ദേശപ്രകാരം എസ് എച്ച് ഒ വിശാൽ ജോൺസൺ,പ്രിൻസിപ്പൽ എസ് ഐ കെ. ദിലീപ്കുമാർ ,എസ് ഐമാരായ എം എസ് ഷംസുദ്ദീൻ, പ്രഷോഭ്, സി പി ഒ മാരായ പ്രശാന്ത് മാത്യു,അരുൺകുമാർ,റസിയ , സുശീല,ടെസിമോൾ ,പ്രദീപ് കുമാർ എന്നിവരാണ് പ്രതിയെ പിടികൂടിയ സംഘത്തിൽ ഉണ്ടായിരുന്നത്.