പീരുമേട്: ഇടുക്കിയിലെ വിവിധ ടൂറിസം കേന്ദ്രങ്ങളിലേക്ക് കുമളിയിൽ നിന്ന് കെ.എസ്.ആർ.ടി.സി വിനോദ സഞ്ചാര സർവ്വീസ് ആരംഭിച്ചു. കുമളിയിൽ നിന്ന് എല്ലാ ഞായറാഴ്ചയും രാവിലെ എട്ടിന് പുറപ്പെടുന്ന ബസ് ആദ്യം പരുന്തുംപാറയിലെത്തും. അവിടത്തെ കുളിർകാറ്റും ടാഗോർ ഹെഡ്ഡും കണ്ടാസ്വദിച്ച ശേഷം വാഗമണ്ണിലേക്ക്. പൈൻവാലിയും മൊട്ടകുന്നും കണ്ട ശേഷം അയ്യപ്പൻകോവിലെത്തി തൂക്കുപാലത്തിൽ കയറാം. അഞ്ചുരുളി ചുരവും കണ്ട് രാമക്കൽമേട് മലമുകളിൽ എത്തും. രാമക്കൽമേട്ടിൽ നിന്ന് തമിഴ്‌നാടിന്റെ സൗന്ദര്യവും ആവോളം ആസ്വദിച്ച് ഉല്ലാസ യാത്രാ വണ്ടി തിരിച്ച് എട്ടുമണിയോടെ കുമിളിയിൽ മടങ്ങി എത്തും. ടിക്കറ്റ് നിരക്ക് 450 രൂപയാണ്. യാത്രക്കാർക്ക് ടിക്കറ്റ് മുൻകൂട്ടി ബുക്ക് ചെയ്യാം.