മൂലമറ്റം: നിയന്ത്രണം വിട്ട കാർ താഴ്ചയിലേക്ക് മറിഞ്ഞു. കാറിലുണ്ടായിരുന്ന നാലംഗ സംഘം പരിക്കേൽക്കാതെ രക്ഷപെട്ടു. തൊടുപുഴ പുളിയൻമല റോഡിലെ കുരുതിക്കളത്തിന് സമീപം ഇന്നലെ ഉച്ചക്ക് ഒന്നരയോടെയായിരുന്നു അപകടം. കട്ടപ്പന ഭാഗത്തേക്ക് പോകുകയായിരുന്നു കാറിലുണ്ടായിരുന്നവർ. ഹെയർപിൻ വളവ് തിരിക്കുന്നതിനിടെ വാഹനത്തിന്റെ നിയന്ത്രണം വിട്ട് റോഡിൽ നിന്ന് താഴേക്ക് പതിക്കുകയായിരുന്നു. വാഹനം തലകീഴായി മറിഞ്ഞു. കാറിനുള്ളിൽ കുടുങ്ങിയ യാത്രക്കാരെ അതുവഴിയെത്തിയ മറ്റ് വാഹനങ്ങളിലെത്തിയവരാണ് പുറത്തെത്തിച്ചത്. വാഹനത്തിന് സാരമായ കേടുപാടുകൾ സംഭവിച്ചെങ്കിലും യാത്രക്കാർ പരിക്കേൽക്കാതെ രക്ഷപെട്ടു. എറണാകുളം സ്വദേശിയുടേതാണ് കാർ.