ചെറുതോണി: എന്റെ കേരളം പ്രദർശന വിപണനമേളയിലെ കാഴ്ച്ചകൾ കണ്ടറിയാൻ ജലവിഭവ മന്ത്രി റോഷി അഗസ്റ്റിൻ കുടുംബ സമേതം എത്തി. മേളയുടെ അവസാന ദിവസമായ ഇന്നലെ ഉച്ചക്കു ശേഷമായിരുന്നു ഭാര്യ റാണി തോമസിനും മകൾ ആൻമരിയക്കുമൊപ്പം മന്ത്രി പ്രദർശന മേള ആസ്വദിക്കാൻ എത്തിയത്. എന്റെ കേരളം പ്രദർശന സ്റ്റാളിലേയും വാണിജ്യ സ്റ്റാളുകളിലേയും തീം സ്റ്റാളുകളിലേയും കാഴ്ച്ചകൾ മന്ത്രി കുടുംബത്തോടൊപ്പം കണ്ടു. ക്യാരറ്റ്, ബീറ്റ്‌റൂട്ട് തുടങ്ങി വിവിധ പച്ചക്കറി ഇനങ്ങളുടെ വിത്തുകൾ മന്ത്രിയും കുടുംബവും വിപണന സ്റ്റാളിൽ നിന്നും വാങ്ങി. എക്‌സൈസ് വകുപ്പൊരുക്കിയ സ്റ്റാളിൽ ക്രമീകരിച്ചിരുന്ന ലഹരിക്കെതിരെ ഒരു ത്രോ പരിപാടിയിൽ ബാസ്‌ക്കറ്റ് ബോൾ ത്രോ ചെയ്ത് മന്ത്രിയും കുടുംബവും പ്രചാരണത്തിൽ പങ്കാളിയായി. കിഫ്ബിയുടെ സ്റ്റാളിൽ ക്രമീകരിച്ചിരുന്ന വെർച്വൽ റിയാലിറ്റി കോർണറിലെത്തി വെർച്വൽ റിയാലിറ്റി ഗ്ലാസ് ധരിച്ചുള്ള കാഴ്ച്ചകളും മന്ത്രിയും കുടുംബവും കണ്ടാസ്വദിച്ചു.