കാർത്തികപുരം: ഉദയഗിരി പഞ്ചായത്തിന്റെ ഉദയഗിരി, ലഡാക്ക്, അരിവിളഞ്ഞ പൊയിൽ, താളിപ്പാറ, മുതശ്ശേരി, തുമരക്കാട് തുടങ്ങിയ പ്രദേശങ്ങളിലുള്ളവർക്ക് ഏകാശ്രയമായിരുന്ന കാർത്തികപുരം ചപ്പാത്ത് ഇനി ഓർമ്മ. 1979-80 ൽ ഉദയഗിരി വികസന സമിതി നിർമ്മിച്ച 11 കരിങ്കൽ തൂണുകളിലുള്ള കോൺക്രീറ്റ് ചപ്പാത്ത് പൊളിച്ചുനീക്കി.
പുതിയ പാലം വന്നതോടെ ചപ്പാത്ത് ഉപയോഗിക്കാതെയായിരുന്നു. മഴക്കാലത്ത് കർണാടക വനത്തിൽ നിന്നും തടികൾ ഒഴികിയെത്തി ചപ്പാത്തിന്റെ തൂണുകളിൽ തടഞ്ഞ് നിന്ന് കാർത്തികപുരം ടൗണിൽ വെള്ളം കയറി നാശനഷ്ടങ്ങൾ ഉണ്ടാകുന്നതിനാൽ ചപ്പാത്ത് പൊളിച്ചു മാറ്റണമെന്ന ആവശ്യം ശകതമായി.

പഞ്ചായത്ത് ഭരണസമിതി ചുമതല ഏറ്റെടുത്തതോടു കൂടി കാർത്തികപുരം ടൗണിന് ഭീഷണിയായ ചപ്പാത്ത് പൊളിക്കാൻ പൊതുമരാമത്ത് വകുപ്പ്, മൈനർ, മേജർ ഇറിഗേഷൻ വകുപ്പ് എന്നിവയുമായി ബന്ധപ്പെട്ടു. എക്‌സിക്യൂട്ടീവ് എൻജിനീയർ അടക്കം പല പ്രാവശ്യം വന്ന് ഇടപെട്ടിട്ടും നടപടി പൂർത്തിയായില്ല. ഈ സാഹചര്യത്തിൽ ഗ്രാമപഞ്ചായത്ത് ജില്ലാ ഭരണകൂടത്തിന്റെ സഹായത്തോടു കൂടി ചപ്പാത്ത് പൊളിച്ച് മാറ്റാൻ നടപടികൾ പൂർത്തിയാക്കി. മത്സരസ്വാഭാവമുള്ള ക്വട്ടേഷനിലൂടെ പൊളിക്കുന്ന ചപ്പാത്തിന്റെ കല്ലും കമ്പിയും പൊളിക്കാൻ ഉള്ള ചെലവിലേക്ക് കണക്കാക്കി ആയിരം രൂപ പഞ്ചായത്തിനും ജി.എസ്.ടി കേന്ദ്ര- സംസ്ഥാന സർക്കാരുകൾക്കും അടച്ചു ചപ്പാത്തുപൊളിക്കാൻ തുടങ്ങുകയായിരുന്നു.