കണ്ണൂർ: ജില്ലയിലെ മലയോര ഗ്രാമപഞ്ചായത്തുകളുടെ വികസന പ്രശ്‌ന പരിഹാരം തേടി മലയോര ഗ്രാമസഭ വിളിച്ചുചേർത്ത് ജില്ലാ പഞ്ചായത്ത്. ഇന്ന് രാവിലെ 10.30ന് പയ്യാവൂർ എൻ.എസ്.എസ് ഓഡിറ്റോറിയത്തിൽ ചേരുന്ന ഗ്രാമസഭയുടെ ഉദ്ഘാടനം പി. സന്തോഷ് കുമാർ എം.പി നിർവഹിക്കും.

മലയോര പ്രദേശങ്ങളിലെ വിവിധ സാദ്ധ്യതകളെ പരമാവധി പ്രയോജനപ്പെടുത്തി മേഖലയിലെ വികസന വിടവ് പരിഹരിക്കുന്നതിന് ജില്ലാ പഞ്ചായത്തിനുള്ള വികസന കാഴ്ചപ്പാട് വിശദീകരിക്കാനും പുതിയ പദ്ധതികൾ തയ്യാറാക്കുന്നതിനുള്ള നിർദ്ദേശങ്ങൾ കേൾക്കുന്നതിനുമാണ് മലയോര ഗ്രാമസഭ ചേരുന്നത്. കാർഷിക ഉല്പന്നങ്ങൾക്ക് ന്യായവില ലഭിക്കാതിരിക്കുക, ഉൽപന്നങ്ങളുടെ വിപണനവും സംഭരണവും, കൃഷിഭൂമിയുടെ തുണ്ടുവൽകരണം, വന്യമൃഗങ്ങളുടെ ആക്രമണത്തിൽ സ്വത്തിനും ജീവനുമുള്ള ഭീഷണികൾ, പ്രകൃതി ദുരന്തങ്ങൾ, ഗതാഗത സൗകര്യങ്ങളുടെ അപര്യാപ്തത, സാമൂഹിക സാമ്പത്തിക പിന്നാക്കാവസ്ഥ തുടങ്ങി മലയോര മേഖല അഭിമുഖീകരിക്കുന്ന നിരവധി പ്രശ്‌നങ്ങൾ മലയോര ഗ്രാമസഭയിൽ ചർച്ച ചെയ്യും.
പയ്യന്നൂർ, തളിപ്പറമ്പ്, ഇരിക്കൂർ, കൂത്തുപറമ്പ്, ഇരിട്ടി, പേരാവൂർ ബ്ലോക്ക് പഞ്ചായത്തിലെയും ചെറുപുഴ , ചെങ്ങളായി, ചപ്പാരപ്പടവ്, നടുവിൽ, ഉദയഗിരി, ആലക്കോട്, എരവേശ്ശി, പയ്യാവൂർ പടിയൂർ, ഉളിക്കൽ, ആറളം, അയ്യൻകുന്ന് പായം, കണിച്ചാർ, കൊട്ടിയൂർ, മുഴക്കുന്ന്, കോളയാട്, പേരാവൂർ ഗ്രാമപഞ്ചായത്തിലെയും മുഴുവൻ ജനപ്രതിനിധികൾ, എം.എൽ.എമാർ, രാഷ്ട്രീയ -സാംസ്‌കാരിക പ്രവർത്തകർ എന്നിവർ പങ്കെടുക്കും.

അതേസമയം യു.ഡി.എഫ് ജനപ്രതിനിധികളെ അറിയിക്കാതെയാണ് ഗ്രാമസഭയെന്നും ജില്ലാ പഞ്ചായത്ത് സങ്കുചിത രാഷ്ട്രീയം കളിക്കുകയാണെന്നും ആരോപിച്ച് യു.ഡി.എഫ് രംഗത്തെത്തി.