പഴയങ്ങാടി: മാട്ടൂൽ സൗത്ത് പുലിമുട്ടിന് സമീപത്തെ കടലിൽ ഇളമ്പക്ക ചാകര. ഇന്നലെ രാവിലെയോടെയാണ് കരയിലേക്ക് ഇളമ്പക്കകൾ തിരയിൽ അടിച്ച് കയറിയത്. മഴകാരണം പ്രക്ഷുബ്ധമായ കടലിന്റെ അടിത്തട്ടിൽ നിന്ന് ഇളകിമറിഞ്ഞു എത്തിയതാണെന്ന് കരുതുന്നു. വിവരം അറിഞ്ഞു അയൽപ്രദേശത്ത് നിന്നടക്കം നിരവധി ആളുകളാണ് കടപ്പുറത്ത് ഇളമ്പക്ക ശേഖരിക്കാനായി എത്തിയത്. വാഹനങ്ങളിലും ചാക്കുകളിലുമായി ഇളമ്പക്ക ശേഖരിച്ചു. ആളുകൾ കൂടിയതോടെ കടലിൽ ഇറങ്ങിയും ഇളമ്പക്ക ശേഖരിക്കാൻ തുടങ്ങി. രാവിലെ മുതൽ ആരംഭിച്ച ഇളമ്പക്ക വാരൽ രാത്രി വരെ തുടർന്നു.