മേപ്പാടി: വനഭൂമിയിൽ നിന്ന് ചന്ദനമരം മുറിച്ച പ്രതികൾ അറസ്റ്റിലായി. മേപ്പാടി ഫോറസ്റ്റ് റേഞ്ചിന് കീഴിലെ പെരുന്തട്ട, ചെമ്പ്ര ഭാഗങ്ങളിൽ നിന്ന് ചന്ദന മരം മുറിച്ച കേസിലാണ് രണ്ട് യുവാക്കളെ വനംവകുപ്പ് പിടികൂടിയത്. ഓടത്തോട് മേലേത്തൊടിക മുഹമ്മദ് ഫിനാൻ (19), ഓടത്തോട് കാട്ടുംകടവത്ത് സാബിൻ റിഷാദ് (19) എന്നിവരാണ് പിടിയിലായത്. സംഭവവുമായി ബന്ധപ്പെട്ട് വിപിൻ കുമാർ (35) നെ കൂടി പിടികൂടാനുണ്ടെന്ന് മേപ്പാടി ഫോറസ്റ്റ് റേഞ്ച് ഓഫീസർ ഡി.ഹരിലാൽ അറിയിച്ചു.

പെരുന്തട്ട കോഫി ബോർഡിന്റെ തോട്ടത്തിന് സമീപത്തെ വനഭൂമിയിൽ നിന്നാണ് മരം മുറിച്ചത്. ചെമ്പ്രയിൽനിന്ന് മരം മുറിക്കാൻ ശ്രമം നടത്തുകയും ചെയ്തു.

ഡെപ്യൂട്ടി റേഞ്ച് ഓഫീസർമാരായ വി.ആർ.ഷാജി, കെ.സനൽ, ബീറ്റ് ഓഫീസർമാരായ റെൽജു വർഗീസ്, ഗണേഷ് കുമാർ എന്നിവരുടെ നേതൃത്വത്തിലാണ് പ്രതികളെ പിടികൂടിയത്.