കൊയിലാണ്ടി: ജില്ലാ പ്രസിഡന്റിന്റെ വ്യാജ ഒപ്പും ജില്ലാ കമ്മിറ്റിയുടെ വ്യാജ ലെറ്റർ പാഡും ഉണ്ടാക്കി സഹകരണ ബാങ്കിൽ പണമിടപാട് നടത്തിയ കേസിലെ പ്രതിയായ ജില്ലാ സെക്രട്ടറിക്കെതിരെ നടപടിയെടുക്കാത്തതിൽ പ്രതിഷേധിച്ച് കോൺഗ്രസ്(എസ്) കൊയിലാണ്ടി ബ്ലോക്ക് കമ്മിറ്റി പിരിച്ചുവിടാനും കോൺഗ്രസ് (എസ് ) ബന്ധം ഉപേക്ഷിക്കാനും ബ്ലോക്ക് കമ്മിറ്റി യോഗം തീരുമാനിച്ചു. പ്രതിയെ സംരക്ഷിക്കുന്നതിനായി ജില്ലാ കമ്മിറ്റി പിരിച്ചു വിട്ട് സംസ്ഥാന കമ്മിറ്റി പുതിയ ജില്ലാ കമ്മിറ്റി രൂപീകരിച്ചിരുന്നു. ഗുരുതര ആരോപണം ഉയർന്നിട്ടും പ്രതിയെ സംരക്ഷിക്കുന്ന നടപടിയാണ് സംസ്ഥാന കമ്മിറ്റി സ്വീകരിച്ചതെന്ന് യോഗം കുറ്റപ്പെടുത്തി. ബ്ലോക്ക് പ്രസിഡന്റ് എ.വി.ബാലകൃഷ്ണൻ അദ്ധ്യക്ഷത വഹിച്ചു. മുൻ ജില്ലാ പ്രസിഡന്റ് സി.സത്യചന്ദ്രൻ, ജില്ലാ സെക്രട്ടറിമാരായ സി.രാമകൃഷ്ണൻ, പി.കെ.ബാലകൃഷ്ണ കിടാവ്, യൂത്ത് കോൺഗ്രസ് (എസ് ) ജില്ലാ ജന.സെക്രട്ടറി പി.വി.സജിത്ത്, ബ്ലോക്ക് ഭാരവാഹികളായ പി.വി.വിജയൻ, സി.കെ.അശോകൻ, പി.വി.അശോകൻ, മൂഴിക്കൽ ചന്ദ്രൻ, എ. വത്സരാജ്, എം.പി.രാഘവൻ, ചെറിയാവി രാജൻ, മണ്ഡലം പ്രസിഡന്റുമാരായ എസ്.വി.റഹ്മത്തുള്ള, എൻ.പി.രവീന്ദ്രൻ, കെ.വി.നാണു, പി.എം.മൊയ്തീൻ കുട്ടി എന്നിവർ പ്രസംഗിച്ചു.