കോഴിക്കോട്: പത്ത് ലക്ഷം വില വരുന്ന എം.ഡി.എം.എയുമായി രണ്ട് യുവാക്കൾ പിടിയിൽ. മെഡിക്കൽ കോളേജ് സ്വദേശി തയ്യിൽ വീട്ടിൽ ഫാസിൽ (27) ,ചെലവൂർ സ്വദേശി പൂവത്തൊടികയിൽ ആദർശ് സജീവൻ (23 )എന്നിവരാണ് പിടിയിലായത്.

ഈസ്റ്റ്ഹിൽ കെ.ടി.നാരായണൻ റോഡിൽ ഇന്നലെ പുലർച്ചെ കാറിൽ സംശയാസ്പദമായ സഹചര്യത്തിൽ കണ്ട യുവാക്കളെ പരിശോധിച്ചപ്പോഴാണ് മയക്കുമരുന്ന് പിടികൂടിയത്. ഇവരിൽ നിന്ന് 36 ഗ്രാം എംഡി.എം.എയും അളന്ന് വിൽപ്പന നടത്താൻ ഉപയോഗിക്കുന്ന പോക്കറ്റ് ത്രാസും പാക്ക് ചെയ്യുന്ന ചെറിയ കവറുകളും കാറും പിടിച്ചെടുത്തു. ബംഗളൂരിൽ നിന്ന് എത്തിച്ച മയക്കുമരുന്ന് ആവശ്യക്കാർക്ക് കൈമാറാൻ സിറ്റിയിൽ എത്തിയപ്പോഴാണ് പൊലീസ് പിടിയിലായത്.

കോഴിക്കോട് ഡെപ്യൂട്ടി പൊലീസ് കമ്മിഷണർ ആമോസ് മാമ്മന്റെ നേതൃത്വത്തിലുളള സിറ്റി ക്രൈം സ്‌ക്വാഡും ആന്റി നാർക്കോട്ടിക് സെൽ അസി. കമ്മിഷണർ ഇമ്മാനുവൽ പോളിന്റെ നേതൃത്വത്തിലുള്ള ഡാൻസാഫ് സക്വാഡും സബ് ഇൻസ്‌പെക്ടർ മനോജ്കുമാറിന്റെ നേതൃത്വത്തിലുള്ള നടക്കാവ് പൊലീസും സംയുക്തമായി നടത്തിയ പരിശോധനയിലാണ് ഇവർ പിടിയിലായത്.