കുന്ദമംഗലം: ശുദ്ധജലത്തിന്റെ ലഭ്യത കുറയുന്ന സാഹചര്യത്തിൽ കാലവർഷം തുടങ്ങി മഴ ശക്തിപ്പെട്ടാൽ വീട്ടിലെ കിണർവെള്ളം മലിനമാകാതെ സംരക്ഷിക്കണമെന്ന് സി.ഡബ്ലിയു.ആർ.ഡി.എം.റിട്ട.സയന്റിസ്റ്റ് ഡോ.മാധവൻ കോമത്ത്. ശുദ്ധജലത്തിന്റെ ലഭ്യത കുറയുന്നതോടൊപ്പം അതിന്റെ ഗുണനിലവാരത്തിനും സാരമായ വ്യതിയാനങ്ങൾ സംഭവിക്കാവുന്നതാണ്. രോഗങ്ങളിൽ മഞ്ഞപിത്തം,കോളറ,ടൈഫോയ് ഡ്, വയറുകടി എന്നീ ജലജന്യരോഗങ്ങൾക്ക് മുഖ്യകാരണം ശുദ്ധമായ കുടിവെള്ളത്തിന്റെ അഭാവമാണ്. മുൻസിപ്പൽ ആക്ട് പ്രകാരം കിണറും സെപ്ടിക് ടാങ്കും തമ്മിലുള്ള അകലം ഏഴരമീറ്ററാണ്. ഈ ദൂരപരിധി കുറവായതിനാൽ കിണർവെള്ളത്തിൽ കോളിഫോം ബാക്ടീരിയ,ഇ.കോളി എന്നിവയും സാനിദ്ധ്യം പ്രകടമാണ്.കേരളത്തിൽ 70 ലക്ഷത്തിലധികം കിണറുകളുണ്ടെന്നാണ് കണക്ക്. ഈ കിണറുകളിലെ കുടിവെള്ളം മലീമസമാക്കാതെ സംരക്ഷിക്കേണ്ടതുണ്ട്.

ശ്രദ്ധിക്കാം

1. കിണർ മഴക്കാലത്തിന് മുമ്പ് നല്ലപോലെ വൃത്തിയാക്കണം.

2.കിണറിന് സമീപം ഓവുചാലോ കുഴികളോ ഉണ്ടെങ്കിൽ അതിൽനിന്ന് കലക്ക് വെള്ളം കിണറിലേക്ക് ഊറിയിറങ്ങുന്നില്ലെന്ന് ഉറപ്പ് വരുത്തണം.വെള്ളം കലങ്ങുകയാണെങ്കിൽ അലൂമിനിയം സൾഫേറ്റ് ഉപയോഗിച്ച് കലക്ക് ഒഴിവാക്കാം.

3. പൗ‌ഡർ ഉപയോഗിച്ചും കിണർ ശുദ്ധമാക്കാം. ആയിരം ലിറ്റർ വെള്ളത്തിലേക്ക് അ‌ഞ്ചുഗ്രാം ബ്ലീച്ചിംഗ് പൗഡറാണ് ഉപയോഗിക്കേണ്ടത്. പൗഡർ ബക്കറ്റിലെ വെള്ളത്തിലിട്ട് നന്നായി ഇളക്കണം. അരമണിക്കൂർ കഴിഞ്ഞ് ഊറിയ ക്ലോറിൻ ലായനിയാണ് കിണറിലേക്ക് ഒഴിക്കേണ്ടത്. ശേഷം 12 മണിക്കൂർ കഴിഞ്ഞ് വെള്ളം ഉപയോഗിക്കാം.

4.കിണർ വെള്ളത്തിലെ നിറം,ദുർഗന്ധം അകറ്റുവാൻ ചിരട്ടകരിയോ ചാർക്കോളോ ഉപയോഗിക്കാം.