ഭൂവനേശ്വർ: ഇന്ത്യൻ വനിതാ ലീഗിൽ ഗോകുലം കേരള വനിതാ ടീമിന് ജയം. ഇന്ന് നടന്ന മത്സരത്തിൽ എതിരില്ലാത്ത എട്ട് ഗോളിന് മാതാ രുഗ്മിണി ഫുട്‌ബോൾ ക്ലബിനെയാണ് ഗോകുലം കേരള പരാജയപ്പെടുത്തിയത്. മൂന്നാം മിനുട്ടിൽ മനീഷ കല്യാണിന്റെ ഗോളോടെയായിരുന്നു ഗോകുലം ഗോൾ വേട്ടക്ക് തുടക്കമിട്ടത്. മത്സരം പുരോഗമിക്കുന്നതിനിടെ മദ്ധ്യനിര താരം കഷ്മിന പരിക്കേറ്റ് പുറത്ത് പോയി. പിന്നീട് മഞ്ജുവായിരുന്നു കളത്തിലെത്തിയത്. 17ാം മിനുട്ടിൽ ഗോകുലം കേരളയുടെ രണ്ടാം ഗോളും പിറന്നു. സൗമ്യയുടെ വകയായിരുന്നു ഗോകുലത്തിന്റെ രണ്ടാം ഗോൾ.

രണ്ട് ഗോൾ വന്നതോടെ എതിർ ടീം ബസ് പാർക്കിംഗ് പ്രതിരോധം പുറത്തെടുത്തു. എന്നാൽ കിട്ടിയ അവസരത്തിലെല്ലാം ഗോകുലം അവസരം മുതലെടുത്ത് കൊണ്ടേയിരുന്നു. 19ാം മിനിട്ടിൽ ഘാന താരം എൽ ഷദായിലൂടെ ഗോകുലം ലീഡ് മൂന്നാക്കി ഉയർത്തി. പിന്നീട് 25, 28 മിനിട്ടുകളിൽകൂടി ഗോൾ നേടിയതോടെ എൽ ഷദായി ഹാട്രിക് സ്വന്തമാക്കുകയും ഗോകുലത്തിന് അഞ്ച് ഗോളിന്റെ അനിഷേധ്യ ലീഡ് നേടിക്കൊടുക്കുകയും ചെയ്തു. ആദ്യ പകുതിയുടെ അധിക സമയത്ത് സൗമ്യ രണ്ടാം ഗോളും നേടിയതോടെ ആദ്യ പകുതിയിൽ എതിരില്ലാത്ത ആറു ഗോളിന്റെ ലീഡ് സ്വന്തമാക്കാൻ ഗോകുലം കേരളക്കായി.

താരതെമ്യേന ദുർബല എതിരാളികളായിരുന്നതിനാൽ തന്നെ മത്സരത്തിന്റെ രണ്ടാം പകുതിയിൽ ഗോകുലം മിക്ക താരങ്ങളേയും പിൻവലിച്ചു. മുന്നേറ്റത്തിൽ നിന്ന് മനീഷ, പ്രതിരോധത്തിൽ നിന്ന് ദലീമ ചിബ്ബർ, എൽ ഷദായ് തുടങ്ങിയവരെ പിൻവലിച്ചു. എങ്കിലും ഗോകുലത്തിന്റെ ഗോൾദാഹത്തിന് കുറവുണ്ടായില്ല. 66ാം മിനുട്ടിൽ മാനസയുടെ ഗോൾ പിറന്നു. ഇതോടെ ഇന്ത്യൻ വനിതാ ലീഗിൽ ഗോൾ നേടുന്ന രണ്ടാമത്തെ മലയാളി താരമാകാൻ മാനസക്ക് കഴിഞ്ഞു. പകരക്കാരിയായി എത്തിയ ജ്യോതി കൂടി ഗോൾ സ്വന്തമാക്കിയതോടെ ഗോകുലത്തിന്റെ ഗോൾ പട്ടിക പൂർത്തിയായി. 85ാം മിനുട്ടിലായിരുന്നു ജ്യോതിയുടെ ഗോൾ. 5ന് കലിംഗ സ്‌റ്റേഡിയത്തിൽ എ ആർ എ എഫ്.സിക്കെതിരേയാണ് ഗോകുലത്തിന്റെ അടുത്ത മത്സരം.