കാർഗിൽ : ഇന്ത്യൻ പ്രധാനമന്ത്രിയായി അടൽബിഹാരി വാജ്‌പേയി വന്നതിന് ശേഷം പാകിസ്ഥാനുമായി സമാധാന ബന്ധം കാത്ത് സൂക്ഷിക്കാനുള്ള നിരവധി നടപടികൾ സ്വീകരിച്ചിരുന്നു. എന്നാൽ പാക് ഭരണകൂടത്തിന്റെ സമാധാന നടപടികളിൽ അവരുടെ സൈന്യം തൃപ്തരായിരുന്നില്ല. നിയന്ത്രണ രേഖയിലൂടെ ഇന്ത്യൻ മണ്ണിലേക്ക് തീവ്രവാദികളെ കയറ്റി വിടാനാണ് പാക് സൈന്യം തീരുമാനിച്ചത്. അന്നത്തെ പാകിസ്ഥാൻ ആർമി ചീഫ് ജനറൽ പർവേസ് മുഷറഫും, മുഹമ്മദ് അസീസ്, ജാവേദ് ഹസൻ, മഹ്മൂദ് അഹമ്മദ് എന്നീ മൂന്ന് ജനറൽമാരുമാണ് ഇന്ത്യയ്‌ക്കെതിരായ സൈനിക നടപടി ആസൂത്രണം ചെയ്തത്. പാക് പദ്ധതി അനുസരിച്ച് ജമ്മു കാശ്മീരിലെ കാർഗിൽ ജില്ലയിലെ പർവതമേഖലയിലേക്ക് നൂറുകണക്കിന് പാക് സൈന്യവും ജിഹാദികളും നുഴഞ്ഞുകയറി.
23 വർഷങ്ങൾക്ക് മുൻപ് 1999 മേയ് മൂന്നിനാണ് പാകിസ്ഥാൻ സൈനികരെ ഇന്ത്യൻ അതിർത്തിയിൽ കണ്ടതായി കാർഗിൽ പർവതപ്രദേശത്തുള്ള പ്രാദേശിക ഇടയന്മാർ ഇന്ത്യൻ സൈന്യത്തെ അറിയിച്ചത്. അടുത്ത ദിവസങ്ങളിൽ ഇടയൻമാരിൽ നിന്നും ലഭിച്ച വിവരങ്ങളെ കുറിച്ച് തിരക്കാൻ ഇന്ത്യ കുറച്ച് സൈനികരെ അതിർത്തിയിലേക്ക് അയച്ചു. എന്നാൽ ഇവരിൽ അഞ്ച് ഇന്ത്യൻ സൈനികർ പാക് സൈന്യത്തിന്റെ ആക്രമണത്തിൽ വീരമൃത്യു വരിച്ചു. ഇതോടെ സൈന്യം ജാഗ്രതയിലായി.
എന്നാൽ ഇന്ത്യയ്‌ക്കെതിരെ ഏകപക്ഷീയമായി ആക്രമണം നടത്താനാണ് പാക് സൈന്യം തുനിഞ്ഞത്. 1999 മേയ് ഒൻപതിന് കാർഗിലിൽ ഇന്ത്യൻ സൈന്യത്തിന്റെ വെടിമരുന്ന് ഡിപ്പോകൾ ലക്ഷ്യമാക്കി പാകിസ്ഥാൻ സൈന്യം കനത്ത ഷെല്ലാക്രമണം ആരംഭിച്ചു. പിന്നാലെ ദ്രാസ്, കക്സർ സെക്ടറുകൾ ഉൾപ്പെടെ ജമ്മു കാശ്മീരിന്റെ മറ്റ് ഭാഗങ്ങളിലേക്ക് പാകിസ്ഥാൻ സൈനികർ നുഴഞ്ഞുകയറ്റം ആരംഭിച്ചു.
ഓപ്പറേഷൻ വിജയ്
പാകിസ്ഥാന്റെ ഭാഗത്ത് നിന്നും ഉണ്ടായ നുഴഞ്ഞ് കയറ്റ ശ്രമങ്ങൾ തകർക്കാൻ മേയ് പകുതിയോടെ ഇന്ത്യ ഓപ്പറേഷൻ വിജയ് എന്ന പേരിൽ ആക്രമണം ആരംഭിച്ചു. സാവധാനം പാകിസ്ഥാനെ തുരത്താനുള്ള പദ്ധതിയാണ് ഇന്ത്യ തയ്യാറാക്കിയത്. കാശ്മീരിലേത് ഭീകരാക്രമണമാണെന്നും തങ്ങൾക്ക് പങ്കില്ലെന്നുമാണ് പാക് വാദം ഉയർത്തിയത്. വ്യോമസേന കൂടി കരസേനയ്‌ക്കൊപ്പം ചേർന്നതോടെയാണ് കാർഗിലിൽ ഇന്ത്യൻ മുന്നേറ്റത്തിന് വേഗം കൈവന്നത്. പിന്നീട് സംഭവിച്ചത് ഇപ്രകാരമായിരുന്നു.
മേയ് 26, 1999: ഇന്ത്യൻ വ്യോമസേന നടത്തിയ വ്യോമാക്രമണത്തിൽ നിരവധി പാകിസ്ഥാൻ നുഴഞ്ഞുകയറ്റക്കാരെ വധിച്ചു.
ജൂൺ 1, 1999: പാകിസ്ഥാൻ കൂടുതൽ ആക്രമണങ്ങൾ നടത്തുകയും ഇന്ത്യൻ ദേശീയ പാത ഒന്ന് ലക്ഷ്യമാക്കി നീക്കങ്ങൾ നടത്തുകയും ചെയ്തു. താമസിയാതെ അന്താരാഷ്ട്രതലത്തിൽ പാകിസ്ഥാനെതിരെ ശബ്ദം ഉയർന്നു തുടങ്ങി. സൈനിക നടപടിയുടെ ഉത്തരവാദിത്തം ഫ്രാൻസും അമേരിക്കയും പാക് സർക്കാരിന് മേൽ ചുമത്തി
ജൂൺ 5, 1999: പാകിസ്ഥാൻ സൈന്യത്തിന്റെ പങ്ക് വെളിപ്പെടുത്തുന്ന രേഖകൾ ഇന്ത്യ പുറത്തുവിട്ടു.
ജൂൺ 9, 1999: ജമ്മു കാശ്മീരിലെ ബതാലിക് സെക്ടറിലെ രണ്ട് സുപ്രധാന സ്ഥാനങ്ങൾ ഇന്ത്യൻ ആർമി തിരിച്ചുപിടിച്ചു.
ജൂൺ 13, 1999: ഇന്ത്യൻ സായുധ സേന ടോലോലിംഗ് കൊടുമുടി തിരിച്ചുപിടിച്ചു. ഇത് പാകിസ്ഥാന് വലിയ തിരിച്ചടിയായിരുന്നു.
ജൂൺ 20, 1999: ടൈഗർ ഹില്ലിന് സമീപമുള്ള പ്രധാന സ്ഥാനങ്ങൾ ഇന്ത്യൻ സൈന്യം തിരിച്ചുപിടിച്ചു.
ജൂലായ് 4, 1999: ഇന്ത്യൻ സൈന്യം ടൈഗർ ഹിൽ തിരിച്ചുപിടിച്ചു.
ജൂലായ് 5 1999: അന്താരാഷ്ട്ര സമ്മർദ്ദത്തെത്തുടർന്ന് കാർഗിലിൽ നിന്ന് പാകിസ്ഥാൻ സൈന്യം പിൻവാങ്ങുന്നതായി പാകിസ്ഥാൻ പ്രധാനമന്ത്രി പ്രഖ്യാപിച്ചു.
ജൂലായ് 12, 1999: പാകിസ്ഥാൻ സൈനികർ പിൻവാങ്ങാൻ നിർബന്ധിതരായി.
ജൂലായ് 14, 1999: ഇന്ത്യൻ പ്രധാനമന്ത്രി സൈന്യത്തിന്റെ 'ഓപ്പറേഷൻ വിജയ്' വൻ വിജയമായി പ്രഖ്യാപിച്ചു.
ജൂലായ് 26, 1999: പാകിസ്ഥാൻ കൈവശപ്പെടുത്തിയ എല്ലാ സ്ഥാനങ്ങളും സൈന്യം തിരിച്ചുപിടിച്ചു
രണ്ട് മാസവും മൂന്നാഴ്ചയും നീണ്ട് നിന്ന കാർഗിൽ യുദ്ധത്തിലൂടെ ഇന്ത്യ അയൽവാസിയുടെ തനിനിറം ലോകത്തിന് മുന്നിൽ വെളിവാക്കി. മാതൃരാജ്യത്തെ രക്ഷിക്കാനുള്ള പോരാട്ടത്തിൽ 500ലധികം ഇന്ത്യൻ സൈനികർ വീരമൃത്യുവരിച്ചു. എന്നാൽ പാകിസ്ഥാന്റെ ഭാഗത്ത് ആയിരക്കണക്കിന് ഭീകരരുടേയും സൈനികരുടേയും ജീവനാണ് നഷ്ടമായത്. മൂവായിരത്തിലധികം പാക് സൈനികരും ഭീകരരും യുദ്ധത്തിൽ ഇന്ത്യൻ സൈന്യത്തിന്റെ കയ്യാൽ വധിക്കപ്പെട്ടു. അന്താരാഷ്ട്ര തലത്തിലും ഇന്ത്യയ്ക്ക് യുദ്ധം നിരവധി സുഹൃത്തുക്കളെ സമ്മാനിച്ചു. ഇന്ത്യ - ഇസ്രയേൽ ബന്ധം ദൃഢമായത് കാർഗിൽ യുദ്ധകാലത്താണ്. ഇന്ത്യയ്ക്ക് ആവശ്യമായ അത്യാധുനിക ആയുധങ്ങൾ നൽകി ഇസ്രയേൽ കൈയയച്ചു സഹായിച്ചു.