ദിവസം മുഴുവൻ ഉന്മേഷത്തോടെയിരിക്കാൻ ആരാണ് ആഗ്രഹിക്കാത്തത്. രാവിലെ കുളിച്ചൊരുങ്ങി സുന്ദരികളായി പുറത്തിറങ്ങുന്നവർ തിരിച്ചെത്തുന്നത് ആകെ വിയർത്ത് ക്ഷീണിച്ചായിരിക്കും. ചില കാര്യങ്ങൾ ശ്രദ്ധിച്ചാൽ ഇനി ക്ഷീണത്തെ പടിക്ക് പുറത്ത് നിറുത്തി സദാസമയവും ഉന്മേഷത്തോടെയിരിക്കാവുന്നതേയുള്ളൂ.

• കുളിക്കുന്ന വെള്ളത്തിൽ അല്പം ചെറുനാരങ്ങ നീര് ചേർക്കുക. കുളിർമ്മ അനുഭവപ്പെടുന്നതിനോടൊപ്പം വിയർപ്പിന്റെ ദുർഗന്ധവും അകറ്റാം.
• കുളിക്ക് ശേഷം ചർമ്മത്തിൽ മോസ്ചറൈസിംഗ് ക്രീം പുരട്ടുക. തേങ്ങാപ്പാൽ തേച്ചുകുളിക്കുന്നത് ശരീരത്തിൽ മോസ്ചറൈസിംഗ് ക്രീം ഉപയോഗിക്കുന്നതിന് തുല്യമാണ്.
• മഞ്ഞൾ ചേർത്ത് കുളിക്കുന്നത് ദുർഗന്ധമകറ്റുന്നതോടൊപ്പം ചർമ്മകാന്തി വർദ്ധിപ്പിക്കുകയും ചെയ്യും. കണ്ണിനും സംരക്ഷണം ആവശ്യമാണ്.
• കട്ടൻചായയോ വെള്ളരിക്ക നീരോ ഫ്രിഡ്ജിൽ വച്ച് തണുപ്പിച്ച ശേഷം പഞ്ഞിയിൽ മുക്കി കണ്ണിന് മുകളിൽ വച്ച് അഞ്ച്മിനിട്ട് നേരം വിശ്രമിക്കുക. കണ്ണിന് അനുഭവപ്പെടുന്ന ക്ഷീണം മാറാൻ നല്ലതാണ് ഇത്.
• പുറത്തു പോയ ശേഷം വീട്ടിലെത്തിയാൽ ഉടൻ കട്ടത്തൈര്, തണ്ണിമത്തൻ, കറ്റാർവാഴ എന്നിവയിലേതെങ്കിലും മുഖത്ത് തേച്ച് പത്ത്മിനിട്ടിനു ശേഷം കഴുകി കളയാം.
• ചുണ്ടുകളിലെ ഈർപ്പം നഷ്ടപ്പെട്ട് വരണ്ട് പൊട്ടാൻ സാദ്ധ്യതയുണ്ട്. ലിപ്സ്റ്റികിന് പകരം ലിപ് ബാമോ വെണ്ണയോ പുരട്ടാവുന്നതാണ്. ഇത് ചുണ്ടുകളിലെ ഈർപ്പം നിലനിറുത്താൻ സഹായിക്കും. ടൂത്ത് ബ്രഷ് ഉപയോഗിച്ച് ചുണ്ടുകൾ മൃദുവായി ഉരസുന്നത് മൃതകോശങ്ങൾ നീങ്ങാൻ സഹായിക്കും.