കൊച്ചി∙ പ്രവാസി മലയാളികൾക്ക് സന്തോഷവാർത്തയുമായി വിമാനകമ്പനിയായ ഗോ എയർ. കൊച്ചിയിൽ നിന്നുള്ള ഗോ എയറിന്റെ ആദ്യ രാജ്യാന്തര സർവീസ് ഈ മാസം 16 മുതൽ ആരംഭിക്കും. ഒമാനിലേക്കാണ് ഗോ എയറിന്റെ സർവീസ്. ആഴ്ചയിൽ രണ്ട് സർവീസുകൾ വീതം ഒമാനിലേക്കും തിരിച്ചും കമ്പനി നടത്തും. തിങ്കൾ, വ്യാഴം ദിവസങ്ങളിൽ രാത്രി എട്ടിന് കൊച്ചിയിൽനിന്ന് യാത്ര തിരിക്കുകയും ചൊവ്വ, വെള്ളി ദിവസങ്ങളിൽ പുലർച്ചെ 4.20ന് തിരികെ കൊച്ചിയിലെത്തുന്ന വിധവുമാണ് വിമാന സർവീസുകൾ.

നിലവിൽ കൊച്ചിയിൽ നിന്ന് ഒമാനിലേക്ക് ആഴ്ചയിൽ 21 വിമാന സർവീസുകൾ വിവിധ കമ്പനികൾ നടത്തുന്നുണ്ട്. ഒമാൻ എയർ, എയർ ഇന്ത്യ, ഇന്‍ഡിഗോ എയർലൈൻസ് എന്നീ കമ്പനികളാണ് കൊച്ചി - ഒമാൻ വിമാന സർവീസ് നടത്തുന്നത്.

ഇതിനു പുറമേയാണ് ഗോ എയറിന്റെ പുതിയ വിമാന സർവീസ് ആരംഭിക്കുന്നത്.