തിരുവനന്തപുരം: സംസ്ഥാനത്ത് വരുന്ന അഞ്ച് ദിവസങ്ങളിൽ ശക്തമായ മഴയുണ്ടാകുമെന്ന് കാലാവസ്ഥാ കേന്ദ്രത്തിന്റെ മുന്നറിയിപ്പ്. ഇന്ന് ഇടുക്കി, എറണാകുളം ജില്ലകളിൽ യെല്ലോ അലർട്ടാണ്. തെക്കൻ കേരളത്തിലെ മലയോര മേഖലകളിൽ ശക്തമായ മഴയുണ്ടാകും. അറബിക്കടലിൽ കാറ്റിന്റെ ശക്തി വർദ്ധിച്ചതിനാൽ കനത്ത കാറ്റിനും ഇടിമിന്നലിനും സാദ്ധ്യതയുണ്ട്. വരുന്ന 24 മണിക്കൂറിൽ 64.5മുതൽ 115 മില്ലിമീറ്റ‌ർ വരെ മഴ ലഭിക്കും.

തെക്ക് പടിഞ്ഞാറൻ കാലവർഷം ഈ ആഴ്‌ച അവസാനത്തോടെ തെക്ക് കിഴക്കൻ ബംഗാൾ ഉൾക്കടലിലും തെക്കൻ ആൻഡമാൻ ഉൾക്കടലിലും എത്തുന്നതിനാൽ ഇത്തവണ മേയ് അവസാനം തന്നെ സംസ്ഥാനത്ത് കാലവ‌ർഷം ആരംഭിക്കുമെന്ന് കാലാവസ്ഥാ കേന്ദ്രം അറിയിച്ചു. ഞായറാഴ്‌ചയോടെ ബംഗാൾ ഉൾക്കടലിലും ആൻഡമാൻ ഉൾക്കടലിലുമെത്തുന്ന കാലവർഷം 10 ദിവസമെടുത്ത് കേരളത്തിലെത്തും.