ബേസിൽ ജോസഫ് - ടൊവിനോ തോമസ് കൂട്ടുകെട്ടിൽ പുറത്തിറങ്ങിയ മിന്നൽ മുരളിക്ക് ഐ.ഡബ്ല്യു,എം ഡിജിറ്റൽ അവാർഡിൽ രണ്ടു പുരസ്കാരങ്ങൾ. ഇന്ത്യയിലെ ഏറ്റവും വലിയ ഒ.ടി.ടി. വെബ് എന്റർടെയിൻമെന്റ് അവാർഡാണിത്. പ്രാദേശിക ഭാഷയിലെ ഏറ്റവും മികച്ച ഡിജിറ്റൽ ചിത്രത്തിനും ഏറ്റവും മികച്ച വിഎഫ്എക്സിനുമുള്ള പുരസ്‌കാരമാണ് മിന്നൽ മുരളി നേടിയത്. ബേസിൽ ജോസഫാണ് അവാ‌ർഡ് വിവരം സോഷ്യൽ മീഡിയയിലൂടെ അറിയിച്ചത്.
ഗോദയ്ക്ക് ശേഷം ബേസിലും ടൊവിനോയും ഒന്നിച്ച ചിത്രം നെറ്റ് ഫ്ലിക്സിലാണ് റിലീസ് ചെയ്കത്. മലയാളം, തമിഴ്, തെലുങ്ക്, കന്നഡ, ഹിന്ദി എന്നീ ഭാഷകളിൽ പുറത്തിറങ്ങിയ ചിത്രം അന്താരാഷ്ട്രതലത്തിൽ തന്നെ ശ്രദ്ധ നേടിയിരുന്നു. നെറ്റ്‌‌ഫ്ലിക്സിന്റെ ആഗോളലിസ്റ്റിൽ ആദ്യ പത്ത് ചിത്രങ്ങളിൽ തുടർച്ചയായി മൂന്നുവാരം ചിത്രം ഇടം നേടിയിരുന്നു. 2021ൽ ഏറ്റവുമധികം റേറ്റിംഗ് ലഭിച്ച ആക്ഷൻ അഡ്വഞ്ചർ ചിത്രങ്ങളുടെ പട്ടികയിലും മിന്നൽ മുരളി ഇടം നേടി.
ഇടിമിന്നലേറ്റ ശേഷം പ്രത്യേക കഴിവ് ലഭിക്കുന്ന ജെയ്‌സൺ എന്ന യുവാവ് കുറുക്കൻ മൂല എന്ന ഗ്രാമത്തിന്റെ രക്ഷകനായി മാറുന്നതാണ് ചിത്രത്തിന്റെ പ്രമേയം. പ്രതിനായക വേഷത്തിലെത്തിയ ഷിബുവിനെ അവതരിപ്പിച്ച ഗുരു സോമസുന്ദരത്തിനും ചിത്രം ബ്രേക്ക് നൽകി.