തിരുവനന്തപുരം: മണ്ണന്തല- നാലാഞ്ചിറ എം സി റോഡ് ഗതാഗത യോഗ്യമാക്കണം എന്നാവശ്യപ്പെട്ട് ബിജെപിയുടെ നേതൃത്വത്തിൽ സായാഹ്ന ധർണ്ണ സംഘടിപ്പിച്ചു. ബിജെപി മണ്ഡലം പ്രസിഡന്റ് അഡ്വ:ബി ജി വിഷ്ണുവാണ് ധർണ്ണ ഉദ്ഘാടനം ചെയ്തത്.

പൊതുമരാമത്ത് വകുപ്പിന്റെ അനാസ്ഥയാണ് റോഡുകൾ ഇത്തരത്തിൽ ഗതാഗതയോഗ്യമല്ലാതെ കിടക്കുന്നതിന് കാരണമെന്ന് ബി ജി വിഷ്ണു ആരോപിച്ചു. 'നിരവധി പരാതികൾ ലഭിച്ചിട്ടും യാതൊരു നടപടിയും സ്വീകരിക്കാതെ പൊതുമരാമത്ത് വകുപ്പ് ജനജീവിതം ദുസഹമാക്കുകയാണ്. ഇതിൽ പ്രതിഷേധിച്ച് ബിജെപി പ്രവർത്തകർ റോഡിൽ വാഴ നട്ടു. സർക്കാരിന്റെ വാർഷികത്തിന് കോടിക്കണക്കിന് രൂപ പി ആർ വർക്കിന് ചെലവഴിച്ച് ആഘോഷിക്കുന്ന പിണറായി സർക്കാരും മന്ത്രി റിയാസും ജനങ്ങളെ വെല്ലുവിളിക്കുകയാണ്'- വിഷ്ണു പറഞ്ഞു.

നിരവധി സ്കൂളുകളും കോളേജുകളും ആരാധനാലയങ്ങളും ഈ ഭാഗത്ത് പ്രവർത്തിക്കുന്നുണ്ട്. സ്കൂൾ തുറക്കുമ്പോൾ പതിനായിരക്കണക്കിന് വിദ്യാർത്ഥികൾ എത്തുന്നിടത്ത് നടപടിയുണ്ടായില്ലെങ്കിൽ നഗരത്തിൽ വലിയ ഗതാഗത പ്രശ്നം തന്നെ സൃഷ്ടിക്കപ്പെടുമെന്നും അദ്ദേഹം പറഞ്ഞു. യോഗത്തിൽ പ്രേമകുമാർ അദ്ധ്യക്ഷത വഹിച്ചു. ബിജെപി നേതാക്കളായ ശ്യാം ചന്ദ്രൻ, മണ്ണന്തല പ്രശാന്ത്, അനിൽകുമാർ കേരളാദിത്യപുരം ശ്രീകുമാർ മണികണ്ഠൻ, ഹരി, ജോതിഷ്, അനിമോൻ തുടങ്ങിയവർ ധർണ്ണയ്ക്ക് നേതൃത്വം നൽകി.