കൊച്ചി: തൃക്കാക്കര മണ്ഡലം യു ഡി എഫിന് അനുകൂലമാണെന്ന് കോൺഗ്രസ് നേതാവ് രമേശ് ചെന്നിത്തല. കോൺഗ്രസ് പ്രചരണം ഫലം കാണുമെന്നും ഉമ തോമസ് വിജയിക്കുമെന്ന കാര്യത്തിൽ സംശയമില്ലെന്നും അദ്ദേഹം പറഞ്ഞു.

എല്ലാവർക്കും സ്വീകാര്യമായ സ്ഥാനാർത്ഥിയാണ് ഉമ തോമസ്. കഴിഞ്ഞ തവണ പി ടി തോമസിന് കിട്ടിയതിനേക്കാൾ കൂടുതൽ വോട്ട് കിട്ടുമെന്നാണ് ഞങ്ങളുടെ പ്രതീക്ഷയെന്ന് ചെന്നിത്തല പറഞ്ഞു. എൽ ഡി എഫ് സ്ഥാനാർത്ഥി ജോ ജോസഫിന്റെ വ്യാജ വീഡിയോ പ്രചരിക്കുന്നതിനെക്കുറിച്ചും അദ്ദേഹം പ്രതികരിച്ചു.

'ഒന്നും പറയാനില്ലാത്തപ്പോഴാണ് ആരോ എവിടെയോ നിർമിച്ച വീഡിയോയുമായി ഇറങ്ങിയിരിക്കുന്നത്. ഞങ്ങൾക്ക് ആ ഒരു പണിയില്ല. തിരഞ്ഞെടുപ്പിൽ പരാജയം മണത്തറിഞ്ഞ ശേഷം എങ്ങനെയെങ്കിലും രക്ഷപ്പെടാനുള്ള അവസാനത്തെ അടവാണ് ഈ പ്രചരണവുമെല്ലാം.'- ചെന്നിത്തല പറഞ്ഞു.