ദുബായ്: നടൻ ജയസൂര്യക്ക് യുഎഇ ഗോൾഡൻ വിസ. വ്യവസായ പ്രമുഖൻ എംഎ യുസഫലിയിൽ നിന്നുമാണ് ജയസൂര്യ വിസ സ്വീകരിച്ചത്. ഭാര്യ സരിതയ്ക്കൊപ്പം ദുബായിലെത്തിയാണ് ഗോൾഡൻ വിസ ജയസൂര്യ സ്വീകരിച്ചത്. വിസ സ്വീകരിക്കുന്നതിന്റെ വീഡിയോയും ചിത്രങ്ങളും ജയസൂര്യ സമൂഹമാദ്ധ്യമങ്ങളിൽ പങ്കുവച്ചിട്ടുണ്ട്.
ബിസിനസ്-ചലച്ചിത്ര-കായിക രംഗങ്ങൾ ഉൾപ്പെടെ വിവിധ മേഖലകളിൽ കഴിവ് തെളിയിച്ചവർക്കാണ് യുഎഇ സർക്കാർ ഗോൾഡൻ വിസ നൽകുന്നത്. മുമ്പ് ചലച്ചിത്ര താരങ്ങളായ മമ്മൂട്ടി, മോഹൻലാൽ, പൃഥ്വിരാജ്, ദുൽഖർ സൽമാൻ, പ്രണവ് മോഹൻലാൽ, ടൊവിനോ തോമസ്, ആസിഫ് അലി, ആശാ ശരത്, ശ്വേതാ മേനോൻ തുടങ്ങി നിരവധി പേർ ഗോൾഡൻ വിസ സ്വീകരിച്ചിരുന്നു.