കോന്നി: ഓട്ടോറിക്ഷ ഓടിക്കുന്നതിനിടെ കുഴഞ്ഞു വീണ് ഡ്രൈവർ മരിച്ചു. നിയന്ത്രണം വിട്ട ഒാട്ടോ മറിഞ്ഞു. കോന്നി
ടൗൺ ഓട്ടോ റിക്ഷ സ്റ്റാൻഡിലെ ഡ്രൈവർ മാങ്കുളം പാറേപ്പള്ളിക്ക് സമീപം സുധീർ മൻസിലിൽ അബ്ദുൽ കരിം (67) ആണ് മരിച്ചത്. ഇന്നലെ രാവിലെ 11.45 ന് കോന്നി - കുമ്പഴ റോഡിൽ ചാങ്കൂർ ജംഗ്ഷനിലെ കാത്തിരുപ്പ് കേന്ദ്രത്തിന് സമീപമായിരുന്നു അപകടം. കോന്നിയിൽ നിന്ന് അട്ടച്ചാക്കലേക്ക് ഓട്ടം പോയി മടങ്ങിവരുമ്പോൾ കുഴഞ്ഞു വീണതിനെ തുടർന്ന് ഓട്ടോറിക്ഷ നിയന്ത്രണം വിട്ട് മറിയുകയായിരുന്നു. തലയ്ക്ക് ഗുരുതരമായ പരിക്കേറ്റ കരീമിന്റെ വാരിയെല്ല് തകർന്ന് ശ്വാസനാളിയിൽ പ്രവേശിച്ചിരുന്നു. ഉടൻ തന്നെ താലൂക്ക് ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.ഓട്ടോയിൽ രണ്ട് യാത്രക്കാർ ഉണ്ടായിരുന്നെങ്കിലും പരുക്കുകളില്ലാതെ രക്ഷപ്പെട്ടു. കോന്നി ടൗണിലെ പഴയകാല ടാക്സി ഡ്രൈവർ കൂടിയായാണ് അബ്‌ദുൾ കരിം. കോന്നി പൊലീസ് മേൽനടപടികൾ സ്വീകരിച്ചു.
മൃതദേഹം പത്തനംതിട്ട ജനറൽ ആശുപത്രിയിൽ പോസ്റ്റുമോർട്ടം നടത്തിയ ശേഷം കോന്നി ടൗൺ ജുമാ മസ്ജിദ് കബർസ്ഥാനിൽ കബറടക്കം നടത്തി. ഭാര്യ. സുബൈദാ ബീവി. മക്കൾ. സുധീർ, സുനീർ, സുധീന
മരുമക്കൾ. നിഷ, ആഷിദ, റഷീദ് (കാര്യറ)