തിരുവല്ല: കഞ്ചാവ് വിൽപ്പന സംബന്ധിച്ച വിവരം എക്‌സൈസിന് ചോർത്തിനൽകിയെന്ന് ആരോപിച്ച് അയൽവാസിയെ കുത്തിപ്പരിക്കേൽപ്പിച്ച കേസിലെ പ്രതി പൊലീസിന്റെ പിടിയിലായി. കുറ്റപ്പുഴ കണ്ടത്തിൻകരയിൽ വീട്ടിൽ രാഹുൽ രാജൻ (24) ആണ് അറസ്റ്റിലായത്. തിങ്കളാഴ്ച രാത്രി 10ന് കിഴക്കൻമുത്തൂർ നാട്ടുകടവ് പയ്യാംപ്ലാത്ത വീട്ടിൽ തോമസ് ജോസഫ് (39) നെ കുത്തിപ്പരിക്കേൽപ്പിച്ച കേസിലാണ് അറസ്റ്റ്. ഗുരുതരമായി പരിക്കേറ്റ തോമസ് കോട്ടയം മെഡിക്കൽ കോളേജ് ആശുപത്രിയിൽചികിത്സയിലാണ്. ഫ്ളക്സ് മുറിക്കാൻ ഉപയോഗിക്കുന്ന കത്തി ഉപയോഗിച്ചാണ് ആക്രമണമെന്ന് പൊലീസ് പറഞ്ഞു. കഞ്ചാവ് കൈവശം വച്ചതിന് രാഹുൽരാജിനെ പ്രതിയാക്കി എക്‌സൈസ് കേസെടുക്കുകയും ഇയാളുടെ ബൈക്ക് കഞ്ചാവ് സഹിതം പിടികൂടുകയും ചെയ്തിരുന്നു. തോമസ് ഒറ്റുകൊടുത്തെന്ന് ആരോപിച്ചായിരുന്നു ആക്രമണം. ആക്രമണത്തിനിടെ രാഹുലിനും പരിക്കേറ്റു. തിരുവല്ല കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.