തിരുവല്ല: കാവുംഭാഗം - ഇടിഞ്ഞില്ലം റോഡിൽ പെരിങ്ങോൾ ജംഗ്ഷന് സമീപം സ്കൂട്ടറും മിനി ലോറിയും കൂട്ടിയിടിച്ചുണ്ടായ അപകടത്തിൽ സ്കൂട്ടർ യാത്രികയായ അദ്ധ്യാപിക മരിച്ചു. മാവേലിക്കര ബിഷപ് മൂർ വിദ്യാപീഠത്തിലെ ചങ്ങനാശേരി വാഴപ്പള്ളി മുല്ലശേരിൽ വീട്ടിൽ എം.എസ് സുനേജിന്റെ ഭാര്യ വിജിമോൾ (32) ആണ് മരിച്ചത്. പെരിങ്ങോൾ വായനശാലയ്ക്ക് സമീപം ഇന്നലെ വൈകിട്ട് നാലുമണിയോടെയായിരുന്നു അപകടം. ഇടിഞ്ഞില്ലം ഭാഗത്ത് നിന്നുവന്ന എയ്സ് മിനി ലോറി മറ്റൊരു വാഹനത്തെ മറികടക്കുന്നതിനിടെ എതിർദിശയിൽ നിന്നുവന്ന സ്കൂട്ടറുമായി കൂട്ടിയിടിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ വിജിമോളെ തിരുവല്ലയിലെ സ്വകാര്യ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല.. സംസ്കാരം പിന്നീട്. മക്കൾ: കാശിനാഥ് (8), കീർത്തന (5), കർണജിത് (9 മാസം).