മല്ലപ്പള്ളി: കാർഷിക മേഖലയുടെ സമഗ്ര വികസനം ലക്ഷ്യമിട്ട് ജില്ലാ കൃഷി വിജ്ഞാന കേന്ദ്രം മല്ലപ്പള്ളി ബ്ലോക്ക് അടിസ്ഥാനമാക്കി ജനപ്രതിനിധി ശാസ്ത്ര സംഗമം ജില്ലാ കൃഷി വിജ്ഞാന കേന്ദ്രത്തിൽ സംഘടിപ്പിച്ചു. ശില്പശാലയുടെ ഉദ്ഘാടനം മല്ലപ്പള്ളി ബ്ലോക്ക് പഞ്ചായത്ത് പ്രസിഡന്റ് ബിന്ദു ചന്ദ്രമോഹൻ നിർവഹിച്ചു. മല്ലപ്പള്ളി ബ്ലോക്കിലെ ജനപ്രതിനിധികളും കെ.വി.കെയിലെ ശാസ്ത്രജ്ഞരും പങ്കെടുത്തു. ബ്ലോക്കിലെ വിവിധ പഞ്ചായത്തുകളിലെ കൃഷി അനുബന്ധ മേഖലകളിലെ വിവിധ പ്രശ്‌നങ്ങളും കർഷകർ നേരിടുന്ന വെല്ലുവിളികളും ജനപ്രതിനിധികൾ സമ്മേളനത്തിൽ അറിയിച്ചു. കാർഷിക മേഖലയിലെ നൂതന സാങ്കേതിക വിദ്യകൾ കൃഷി വിജ്ഞാന കേന്ദ്രത്തിലെ വിദഗ്ദർ അവതരിപ്പിച്ചു. കൃഷി വിജ്ഞാന കേന്ദ്രം നടപ്പിലാക്കുന്ന മുൻ നിരപ്രദർശനങ്ങളും, പങ്കാളിത്ത പരീക്ഷണങ്ങളും, പരിശീലനങ്ങളും വിവിധ പഞ്ചായത്തുകളുമായി സഹകരിച്ച് നടപ്പിലാക്കുന്നതിനും തീരുമാനിച്ചു. മല്ലപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്റ് റീമി ലിറ്റി കൈപ്പള്ളിൽ അദ്ധ്യക്ഷത വഹിച്ച ചടങ്ങിൽ കൃഷി വിജ്ഞാന കേന്ദ്രം മേധാവി ഡോ. സി.പി.റോബർട്ട് മുഖ്യ പ്രഭാഷണം നടത്തി. ബ്ലോക്ക് പഞ്ചായത്ത് അംഗങ്ങളായ ബാബൂ കൂടത്തിൽ, സുധി കുമാർ, ഈപ്പൻ വർഗീസ്, ആനി രാജു, സിന്ധു സുഭാഷ് കുമാർ, അമ്പിളി പ്രസാദ്, സി.എൻ മോഹനൻ കവിയൂർ പഞ്ചായത്ത് പ്രസിഡന്റ് ദിനേശ് കുമാർ, കെ.വി.കെയിലെ സ്‌പെഷ്യലിസ്റ്റുമാർ തുടങ്ങിയവർ പങ്കെടുത്തു.