കൊല്ലം: മൺറോതുരുത്ത് റെയിൽവേ സ്​റ്റേഷൻ വികസനത്തിന് 3 കോടിയുടെ പദ്ധതിയുമായി റെയിൽവേ. തുരുത്തിലെ ഹാൾട്ട് സ്​റ്റേഷനിൽ യാത്രക്കാരുടെ സൗകര്യങ്ങൾ വർദ്ധിപ്പിക്കുക, രണ്ടാം പ്ലാ​റ്റ് ഫോമിന്റെ ലെവൽ ഉയർത്തുക എന്നിവയാണ് പ്രധാന ലക്ഷ്യം.

നിലവിലുള്ള രണ്ട് പ്ലാ​റ്റ് ഫോമുകൾക്കും 14 കോച്ചുകൾ നിറുത്താവുന്ന നീളം മാത്രമാണുള്ളത്. രണ്ടാം പ്ലാ​റ്റ് ഫോമിന്റെ ഉയരം കുറവായതിനാൽ സ്ത്രീകളും കുട്ടികളും വൃദ്ധരുമടക്കമുള്ള യാത്രക്കാർ വല്ലാതെ ബുദ്ധിമുട്ടുന്നുണ്ട്. ഇത് നിത്യേന അപകടങ്ങൾക്കും കാരണമാകുന്നു. രണ്ടാം പ്ലാ​റ്റ് ഫോമിന്റെ ഉയരം ട്രെയിനിന്റെ വാതിൽപ്പടിയോളം ഉയർത്താൻ അനുമതി ലഭിച്ചിട്ടുണ്ട്. സ്​റ്റേഷനിലെ രണ്ട് പ്ലാ​റ്റ് ഫോമുകളെയും ബന്ധിപ്പിച്ച് ഓവർ ബ്രിഡ്ജ് പണിയണമെന്ന ആവശ്യത്തിനും പഴക്കമെറെയുണ്ട്. നിലവിൽ ട്രാക്കിലൂടെയാണ് ഇരു പ്ളാറ്റ് ഫോമുകളിലേക്കും എത്തുന്നത്. ഓവർ ബ്രിഡ്ജ് നിർമ്മിക്കുന്ന കാര്യം സതേൺ റെയിൽവേ പരിഗണിക്കുമെന്ന് അഡിഷണൽ ജനറൽ മാനേജർ ബി.ജി.മല്ലയ്യ പറഞ്ഞു. സ്​റ്റേഷനിൽ പേപ്പർ ടിക്ക​റ്റിന് പകരം കമ്പ്യൂട്ടറൈസ്ഡ് ടിക്ക​റ്റ് സംവിധാനം നടപ്പാക്കണമെന്ന ആവശ്യവും പരിഗണിക്കും. തുക അനുവദിച്ച രണ്ട് പദ്ധതികളുടെയും ടെൻഡർ നടപടികൾ പൂർത്തീകരിച്ച് യുദ്ധകാലാടിസ്ഥാനത്തിൽ ജോലികൾ ആരംഭിക്കണമെന്ന് കൊടിക്കുന്നിൽ സുരേഷ് എം.പി ആവശ്യപ്പെട്ടു.