കരുനാഗപ്പള്ളി : വിവാഹത്തിനെത്തിയ എല്ലാവർക്കും വൃക്ഷതൈ നൽകി കേരള യൂത്ത്പ്രമോഷൻ കൗൺസിൽ. കൗൺസിലിന്റെ കൊല്ലം ജില്ലാ ഉപസമിതി കൺവീനർ പടനായർകുളങ്ങര വടക്ക് മദീന മൻസിലിൽ ഹിന്ദി അദ്ധ്യാപകനായ മുഹമ്മദ്‌ സലിംഖാൻ - സൈറാബാനു ദമ്പതികളുടെ മകൻ മുഹമ്മദ്‌ ആസിഫ്ഖാന്റെയും പാലക്കാട്‌ പുതുക്കോട് ചിറക്കൽ വീട്ടിൽ ഇസ്മായിൽ - സീനത്ത് ദമ്പതികളുടെ മകൾ ഷഹാനയും തമ്മിലുള്ള
വിവാഹമാണ് ഹരിതാഭമായത്. വിവാഹത്തിൽ പങ്കെടുക്കാനെത്തിയ എല്ലാവരും വൃക്ഷതൈകളുമായാണ് മടങ്ങിയത്.
നമുക്കുവേണ്ടി, മണ്ണിനുവേണ്ടി കാമ്പയിനും കിംസ് ഹെൽത്ത് സി.എസ്.ആർ ട്രീ ആംബുലൻസുമാണ് തൈകൾ സജ്ജമാക്കിയത്. പരിസ്ഥിതി സംരക്ഷണത്തിന്റെ ആവശ്യകത പൊതുസമൂഹത്തിൽ എത്തിക്കാൻ ഇത്തരം പദ്ധതിക്ക് സാധിക്കുമെന്ന് വൃക്ഷത്തൈ ഏറ്റുവാങ്ങിക്കൊണ്ട് സി.ആർ.മഹേഷ് എം.എൽ.എ പറഞ്ഞു.
നഗരസഭാ ചെയർമാൻ കോട്ടയിൽ രാജു, വിദ്യാഭ്യാസ സ്ഥിരം സമിതി അദ്ധ്യക്ഷ ശ്രീലത, മുൻ നഗരസഭാ ചെയർപേഴ്സൻ എം.ശോഭന, മുൻ വൈസ് ചെയർമാൻ ആർ.രവീന്ദ്രൻപിള്ള ഉൾപ്പെടെയുള്ളവർ തൈകൾ ഏറ്റുവാങ്ങി. കൗൺസിൽ സംസ്ഥാന സമിതി അംഗം അനിൽ കിഴക്കടത്ത്, ജില്ലാ കോ - ഓർഡിനേറ്റർ ഗൗരി എസ്. കുമാർ, ജില്ലാ ഉപസമിതി ഭാരവാഹികളായ പോച്ചയിൽ മുഹമ്മദ്‌ റാഫി, അനസ് പുതുവീട്ടിൽ എന്നിവർ വൃക്ഷതൈ വിതരണത്തിന് നേതൃത്വം നൽകി.