കൊല്ലം: വിചാരണ നടക്കുന്ന കേസുകളിലെ വാർത്താ അവതരണത്തിൽ മാദ്ധ്യമപ്രവർത്തകർ സ്വയം അതിർത്തി നിർണയിക്കണമെന്ന് സുപ്രീംകോടതി ജഡ്ജി ജസ്റ്റിസ് സി.ടി.രവികുമാർ. കൊല്ലം പ്രസ് ക്ലബിന്റെ സുവർണ ജൂബിലി ആഘോഷ സമാപനം ഉദ്ഘാടനം ചെയ്യുകയായിരുന്നു അദ്ദേഹം. കേസുകളിൽ ഉൾപ്പെടുന്നവർ കുറ്റാരോപിതർ മാത്രമാണ്. ഇവരുടെ പശ്ചാത്തലം കൂടി ഉൾക്കൊണ്ടാകണം വാർത്തകൾ നൽകേണ്ടതെന്നും അദ്ദേഹം പറഞ്ഞു. അസീസിയ മെഡിക്കൽ കോളേജ് ചെയർമാൻ എം.അബ്ദുൽ അസീസ്, കെ.എം.എം.എൽ എം.ഡി ജെ.ചന്ദ്രബോസ്, വൈസ്രോയി ഹോസ്പിറ്റൽ ഡയറക്ടർ ഗോപിനാഥ പിള്ള, ആർകിടെക്ട് ആബിദ് മുഹമ്മദ് ആസാദ് എന്നിവരെ ആദരിച്ചു. പ്രസ് ക്ലബ് പ്രസിഡന്റ് അജിത് ശ്രീനിവാസൻ അദ്ധ്യക്ഷനായി. കെ.യു.ഡബ്ല്യു.ജെ സംസ്ഥാന ജനറൽ സെക്രട്ടറി ഇ.എസ്.സുഭാഷ്, പ്രസ് ക്ലബ് സെക്രട്ടറി ജി.ബിജു, ട്രഷറർ സുജിത് സുരേന്ദ്രൻ എന്നിവർ സംസാരിച്ചു.