കയ്പമംഗലം: പെരിഞ്ഞനം പഞ്ചായത്ത് കൃഷിഭവന് സ്വന്തം കെട്ടിടമായി. പുതിയതായി നിർമ്മിച്ച കെ.വി. കൃഷ്ണൻ സ്മാരക കൃഷിഭവൻ കെട്ടിടം ജില്ലാ പഞ്ചായത്ത് പ്രസിഡന്റ് പി.കെ. ഡേവിസ് മാസ്റ്റർ ഉദ്ഘാടനം ചെയ്തു. പഞ്ചായത്തിലെ പത്താം വാർഡിൽ കിഴക്കേടത്ത് രഞ്ജിത്ത് സൗജന്യമായി നൽകിയ അഞ്ച് സെന്റ് ഭൂമിയിലാണ് ജില്ലാ പഞ്ചായത്ത് അനുവദിച്ച 25 ലക്ഷം രൂപ ചെലവഴിച്ച് കെട്ടിട നിർമ്മാണം പൂർത്തീകരിച്ചത്.

വർഷങ്ങളായി വാടക കെട്ടിടത്തിലാണ് കൃഷിഭവൻ പ്രവർത്തിച്ചുവന്നിരുന്നത്. പഞ്ചായത്ത് പ്രസിഡന്റ് വിനീത മോഹൻദാസ് അദ്ധ്യക്ഷയായി. മതിലകം ബ്ലോക്ക് പഞ്ചായത്ത് പ്രസിഡന്റ് സി.കെ. ഗിരിജ, കെ.എസ്. ജയ, സായിദ മുത്തുക്കോയ തങ്ങൾ, ഷീജ ബാബു എന്നിവർ പങ്കെടുത്തു. കെട്ടിടത്തിന് സൗജന്യമായി സ്ഥലം നൽകിയ രഞ്ജിത്ത് കിഴക്കേടത്തിനെ ചടങ്ങിൽ ആദരിച്ചു.