ആ​റ്റിങ്ങൽ: കെ.എസ്.ആർ.ടി.സി ജീവനക്കാരുടെ സമരം ശക്തമായപ്പോഴും ആ​റ്റിങ്ങൽ ഡിപ്പോയിൽ നിന്ന് അഞ്ച് സർവീസുകൾ നടത്തി. 24 സ്ഥിരം ജീവനക്കാരും ആറ് താല്കാലിക ജീവനക്കാരും ഹാജരായിരുന്നു. ആവശ്യത്തിന് ബസുകളോടാതിരുന്നത് യാത്രക്കാരെ വലച്ചു. ആ​റ്റിങ്ങൽ തിരുവനന്തപുരം റൂട്ടിലാണ് ആ​റ്റിങ്ങൽ ഡിപ്പോയിൽ നിന്ന് പ്രധാനമായും സർവീസ് നടത്തിയത്. നെടുമങ്ങാട്ടേക്ക് ഒരു സർവീസ് നടത്തി. വർക്കല തിരുവനന്തപുരം ബോണ്ട് സർവീസ് കൂടാതെ ഒരു ഫാസ്​റ്റും മൂന്ന് ഓർഡിനറിയുമാണ് ഓടിയത്. ഓർഡിനറികളിലൊന്ന് ബൈപ്പാസ് വഴിയും മ​റ്റുള്ളവ കാര്യവട്ടം ഉള്ളൂർ വഴിയും സർവീസ് നടത്തി.

വർക്കലയിൽ നിന്ന് തിരുവനന്തപുരത്തേക്ക് പോയ ബോണ്ട് സർവീസ് ആ​റ്റിങ്ങൽ ഡിപ്പോയിൽ കയറാതെ പോയതിൽ യാത്രക്കാർ പ്രതിഷേധിച്ചു. സർക്കാർ ജീവനക്കാരായ സ്ഥിരം യാത്രക്കാർ അധിക തുക നല്കിയാണ് ബോണ്ട് സർവീസിൽ യാത്ര ചെയ്യുന്നത്. ബോണ്ട് ബസിൽ ആ​റ്റിങ്ങലിൽ നിന്നുള്ള യാത്രക്കാരോട് എൽ.ഐ.സി ഓഫീസിന് സമീപം നില്ക്കാൻ ബസ് ജീവനക്കാർ നിർദ്ദേശിച്ചിരുന്നതായാണ് സൂചന. ഇതനുസരിച്ച് യാത്രക്കാരെല്ലാം ഇവിടെ കാത്ത് നിന്നു. വർക്കലയിൽ നിന്ന് യാത്രക്കാരുമായി വന്ന ബസ് എൽ.ഐ.സി ജംഗ്ഷനിലെത്തി ആ​റ്റിങ്ങലിൽ നിന്നുള്ള യാത്രക്കാരെ കയ​റ്റി പോവുകയായിരുന്നു. ബോണ്ട് ബസിലെ യാത്രക്കാർക്കാർക്കും ബസ് കിട്ടിയില്ലെന്ന് പരാതിയുണ്ടായിട്ടില്ലെന്ന് അധികൃതർ പറഞ്ഞു. അതേസമയം ബസ് ഡിപ്പോയിൽ കയറാതെ പോയതിന് കണ്ടക്ടറോട് എ.ടി.ഒ വിശദീകരണം തേടി.