തിരുവനന്തപുരം: 'നല്ല ഭക്ഷണം നാടിന്റെ അവകാശം' എന്ന കാമ്പെയിനിൽ ഇന്നലെ 572 പരിശോധനകൾ നടത്തിയതായി ആരോഗ്യ മന്ത്രി വീണാ ജോർജ്. ലൈസൻസോ രജിസ്‌ട്രേഷനോ ഇല്ലാത്ത 10 കടകൾക്കെതിരെ നടപടി സ്വീകരിച്ചു. 65 സ്ഥാപനങ്ങൾക്ക് നോട്ടീസ് നൽകി. 18 കിലോഗ്രാം വൃത്തിഹീനമായ മാംസം നശിപ്പിച്ചു. നാല് സാമ്പിളുകൾ പരിശോധനയ്ക്കയച്ചു.

ഈ മാസം 2 മുതൽ ഇന്നലെ വരെ ഏഴ് ദിവസം സംസ്ഥാന വ്യാപകമായി 1704 പരിശോധനകളാണ് നടത്തിയത്. ലൈസൻസോ രജിസ്‌ട്രേഷനോ ഇല്ലാത്ത 152 കടകൾക്കെതിരെ നടപടി സ്വീകരിച്ചു. 531 സ്ഥാപനങ്ങൾക്ക് നോട്ടീസ് നൽകി. 180 കിലോഗ്രാം മാംസം നശിപ്പിച്ചു. 129 സാമ്പിളുകൾ പരിശോധനയ്ക്കയച്ചു

ഓപ്പറേഷൻ മത്സ്യയിൽ, പഴകിയതും രാസവസ്തുക്കൾ കലർന്നതുമായ 6069 കിലോഗ്രാം മത്സ്യം നശിപ്പിച്ചു. 4026 പരിശോധനകളിൽ 2048 സാമ്പിളുകൾ പരിശോധനയ്‌ക്ക് അയച്ചു. ശർക്കരയിലെ മായം കണ്ടെത്താനുള്ള ഓപ്പറേഷൻ ജാഗറിയിൽ 481 സ്ഥാപനങ്ങൾ പരിശോധിച്ചു. പരിശോധനയ്ക്കായി ശർക്കരയുടെ 134 സാമ്പിൾ ശേഖരിച്ചിട്ടുണ്ട്. പരിശോധനകൾ ശക്തമായി തുടരുമെന്ന് മന്ത്രി പറഞ്ഞു.