നെയ്യാറ്റിൻകര: പകർച്ചവ്യാധി പ്രതിരോധ പ്രവർത്തനങ്ങൾ ഊർജിതമാക്കാൻ തദ്ദേശ സ്വയംഭരണ സ്ഥാപനങ്ങൾ ജനകീയ പങ്കാളിത്തത്തോടെ ശുചീകരണ യജ്ഞത്തിനായി നഗരസഭ വിപുലമായ പ്രവർത്തനങ്ങൾ നടപ്പിലാക്കുമെന്ന് ചെയർമാൻ പി.കെ. രാജമോഹനും ആരോഗ്യസ്ഥിരം സമിതി ചെയർമാൻ ജോസ് ഫ്രാങ്ക്ളിനും അറിയിച്ചു. ഇതോടനുബന്ധിച്ച് ചേർന്ന അവലോകനയോഗത്തിൽ വാർഡ് തല ശുചിത്വ ആരോഗ്യ പോഷണ സമിതിയുടെ ആക്ഷൻ പ്ലാനിന് അംഗീകാരം നൽകുകയും ശുചിത്വ മിഷന്റെ ആക്ഷൻ പ്ലാൻ പ്രകാരമുള്ള പ്രവർത്തനം ഫീൽഡ് തലത്തിൽ ജനകീയ പങ്കാളിത്തത്തോടെ ഏറ്റെടുത്ത് നടപ്പിലാക്കാനും തീരുമാനമായി. വാർഡ് തലത്തിൽ 50 വീടുകൾ ഉൾപ്പെടുത്തി ക്ലസ്റ്റർ രൂപീകരിച്ച് ശുചിത്വ സ്ക്വാഡ് പ്രവർത്തനം ഊർജ്ജിതമാക്കുകയും ആരോഗ്യ മാപ്പിംഗ്, മൈക്രോ പ്ലാൻ പൂർത്തീകരണം എന്നിവ സംഘടിപ്പിക്കും. പൊതുജനാരോഗ്യ പ്രശ്നം കണ്ടെത്തൽ വീടുകൾ,സ്ഥാപനം, ജലാശയം, പൊതുസ്ഥലം തുടങ്ങിയ സ്ഥലങ്ങളിൽ ആരോഗ്യ പ്രവർത്തകർ പരിശോധന നടത്തും. ഹരിതകർമ്മസേനയുടെ നേതൃത്വത്തിൽ വീടുകൾ, സ്ഥാപനം, ആശുപത്രി, മറ്റു സർക്കാർ പൊതു സ്ഥാപനങ്ങൾ എന്നിവ കേന്ദ്രീകരിച്ച് പാഴ്‌വസ്തു ശേഖരണം നടത്തും. ജൈവ മാലിന്യം ഉറവിടത്തിൽ സംസ്കരിക്കൽ, അജൈവ മാലിന്യം ഉറവിടത്തിൽ തരം തിരിച്ച് മാലിന്യങ്ങൾ ശാസ്ത്രീയമായി സംസ്കരിക്കും.
അയ്യങ്കാളി തൊഴിലുറപ്പ് പദ്ധതി പ്രവർത്തകർ, കുടുംബശ്രീ പ്രവർത്തകർ, സാനിറ്റേഷൻ കമ്മിറ്റി അംഗങ്ങൾ, ഹരിത കർമ്മ സേനാംഗങ്ങൾ, റസിഡൻസ് അസോസിയേഷൻ പ്രവർത്തകർ, മറ്റ് സന്നദ്ധ പ്രവർത്തകർ എന്നിവരെ പങ്കെടുപ്പിച്ച് പകർച്ചവ്യാധി നിയന്ത്രണ പരിപാടികൾ നടത്തും. അവലോകന യോഗം നഗരസഭാ ചെയർമാൻ പി.കെ. രാജമോഹനൻ ഉദ്ഘാടനം ചെയ്തു. ആരോഗ്യസ്ഥിരം സമിതി ചെയർമാൻ ജോസ് ഫ്രാങ്ക്ളിൻ അദ്ധ്യക്ഷത വഹിച്ചു. നഗരസഭ സെക്രട്ടറി ആർ. മണികണ്ഠൻ, ഹെൽത്ത് സൂപ്പർവൈസർ ശശികുമാർ, മെഡിക്കൽ ഓഫീസർമാർ തുടങ്ങിയവർ പങ്കെടുത്തു.