ചിറയിൻകീഴ്:ചിറയിൻകീഴ് ഗ്രാമപഞ്ചായത്ത്,കൃഷിഭവൻ എന്നിവർ സംയുക്തമായി ആരംഭിച്ച 'ഞങ്ങളും കൃഷിയിലേക്ക്' എന്ന പദ്ധതിയിൽ മുസലിയാർ എൻജിനിയറിംഗ് കോളേജിലെ എൻ.എസ്.എസ് യൂണിറ്റ് ഭാഗമായി. ഇതോടനുബന്ധിച്ച് കോളേജ് കാമ്പസിൽ വിഷരഹിത പച്ചക്കറി കൃഷിയും തണ്ണീർത്തട സംരക്ഷണവും പ്രോത്സാഹിപ്പിക്കുന്നതിനായി ജൈവവൈവിദ്ധ്യ ക്ലബ്, നേച്ചർ ക്ലബ് എന്നിവ രൂപീകരിച്ചു. ക്ലബുകളുടെ ഉദ്ഘാടനം പഞ്ചായത്ത് പ്രസിഡന്റ് പി.മുരളി നിർവഹിച്ചു. മുസലിയാർ കോളേജ് പ്രിൻസിപ്പൽ ഡോ.കെ.കെ അബ്ദുൽ റഷീദ് അദ്ധ്യക്ഷത വഹിച്ചു.അസിസ്റ്റന്റ് കൃഷി ഓഫീസർ അനിൽകുമാർ, ജൈവവൈവിദ്ധ്യ കോർഡിനേറ്റർ ഷാർജ.എസ്,വാർഡ് മെമ്പർ അനീഷ്,എൻ.എസ്.എസ് പ്രോഗ്രാം ഓഫീസർമാരായ പ്രൊഫ.ആർ. രഞ്ചു, പ്രൊഫ.ശരണ്യ തുടങ്ങിയവർ പങ്കെടുത്തു.ക്ലബ് ഭാരവാഹികളായി സൈദ് മുഹമ്മദിനെയും മുഹമ്മദ് അഫ്‌ലയെയും തിരഞ്ഞെടുത്തു. എൻ.എസ്.എസ് വോളന്റിയർമാർ 100 പച്ചക്കറി തൈകൾ കോളേജ് കാമ്പസിൽ വച്ചുപിടിപ്പിച്ചു.