തിരുവനന്തപുരം: സംസ്ഥാനത്ത് മൂന്നു ദിവസം ഒറ്റപ്പെട്ട മഴയ്‌ക്ക് സാദ്ധ്യത. മദ്ധ്യ, വടക്കൻ ജില്ലകളിലാണ് കൂടുതൽ മഴ ലഭിക്കുന്നത്. തെക്കൻ ജില്ലകളിൽ ഒറ്റപ്പെട്ട മഴ ലഭിക്കും. മദ്ധ്യ വടക്കൻ ജില്ലകളിൽ 30 കിലോമീറ്റർ വേഗതയിൽ കാറ്റിനും സാദ്ധ്യതയുണ്ട്. തെക്ക് കിഴക്കൻ അറബിക്കടലിനു മുകളിലെ ചക്രവാതച്ചുഴിയും കേരളത്തിനും തമിഴ് നാടിനും മുകളിലൂടെയുള്ള ന്യൂനമർദ്ദപാത്തിയുടെയും സാഹചര്യത്തിലാണ് മഴ ലഭിക്കുന്നത്. ഇന്ന് എറണാകുളം, ഇടുക്കി, പാലക്കാട്, മലപ്പുറം, കോഴിക്കോട്, വയനാട് എന്നീ ജില്ലകളിൽ മഴയുടെ പശ്ചാത്തലത്തിൽ യെല്ലോ അലർട്ടും പ്രഖ്യാപിച്ചിട്ടുണ്ട്. കേരള-ലക്ഷദ്വീപ് തീരങ്ങളിൽ ശക്തമായ കാറ്റിനും മോശം കാലാവസ്ഥയ്ക്കും സാദ്ധ്യതയുള്ളതിനാൽ ഈ പ്രദേശങ്ങളിൽ മത്സ്യബന്ധനം പാടില്ല.