മാനന്തവാടി: വയനാട്ടിൽ പണിമുടക്കിൽ പങ്കെടുക്കാത്തതിന് കെ.എസ്.ആർ.ടി.സി ജീവനക്കാരന് മർദ്ദനമേറ്റതായി പരാതി. കെ.എസ്.ആർ.ടി.സി ജീവനക്കാരുടെ പണിമുടക്കിൽ പങ്കെടുക്കാത്തത്തിന്റ പേരിൽ ഒരു സംഘം ജീവനക്കാർ മർദ്ദിച്ചതായാണ് പരാതി.

മർദ്ദനമേറ്റ മാനന്തവാടി ഡിപ്പോയിലെ ജീവനക്കാരൻ കല്ലോടി സ്വദേശി എൻ.എ.ഷാജി (42)യെ മാനന്തവാടി മെഡിക്കൽ കോളേജിൽ പ്രവേശിപ്പിച്ചു. ഞായറാഴ്ച വൈകിട്ട് 7.30 ഓടെ യാണ് സംഭവം.
കഴിഞ്ഞ ദിവസം നടന്ന കെ എസ് ആർ ടി സി ജീവനക്കാരുടെ പണിമുടക്ക് ദിവസം തിരുവനന്തപുരത്തേക്കുള്ള ബസ്സിൽ ഷാജി ഡ്യൂട്ടി ചെയ്തിരുന്നു. മുൻകൂട്ടി റിസർവേഷൻ ഉണ്ടായിരുന്ന ബസ്സിൽ യാത്രക്കാർക്ക് ബുദ്ധിമുട്ട് ഉണ്ടാവാതിരിക്കാനാണ് പണിമുടക്ക് ദിവസം ഡ്രൈവർ കം കണ്ടക്ടർ കൂടിയായ ഷാജി ഡ്യൂട്ടി ചെയ്തത്. ഷാജി ഡ്യൂട്ടിക്ക് ഹാജരായതിൽ പ്രകോപിതരായ ചില ജീവനക്കാർ ഷാജിയെ ഭീഷണിപ്പെടുത്തിയിരുന്നു,

കെ എസ് ആർ ടി സി മാനന്തവാടി ഡിപ്പോയിലെ ജീവനക്കാരായ കണ്ടാലറിയാവുന്നവരാണ് തന്നെ മർദ്ദിച്ചതെന്ന് ഷാജി പറഞ്ഞു. കല്ലുകൊണ്ടുള്ള അടിയിൽ ഷാജിയുടെ ഇടതു കണ്ണിനു താഴെയും നെറ്റിയിലും ഗരുതരമായി പരുക്കേറ്റിട്ടുണ്ട്.