ചേർത്തല: താലൂക്ക് ആശുപത്രിയിൽ പൊലീസ് എയ്ഡ് പോസ്​റ്റ് പ്രവർത്തനം തുടങ്ങി. അത്യാഹിത വിഭാഗത്തിന് മുന്നിലാണ് എയ്ഡ് പോസ്​റ്റ് സ്ഥാപിച്ചിരിക്കുന്നത്. 24 മണിക്കൂറും ഇവിടെ പൊലീസിന്റെ സേവനം ഉണ്ടാകും. പൊലീസ് എയ്ഡ് പോസ്​റ്റ് പ്രവർത്തിക്കാത്തത് ആശുപത്രിയിലെ അക്രമങ്ങൾക്ക് കാരണമാകുന്നെന്ന് വ്യാപകമായ വിമർശനം ഉയർന്നിരുന്നു. 2 വർഷം മുമ്പാണ് ആശുപത്രിയിലെ അത്യാഹിത വിഭാഗത്തിനു മുന്നിൽ എയ്ഡ് പോസ്​റ്റ് നഗരസഭയുടെ നേതൃത്വത്തിൽ സ്ഥാപിച്ചത്. ഉദ്ഘാടനത്തിന് ശേഷം കുറച്ചു ദിവസങ്ങളിൽ പൊലീസ് ഉണ്ടായിരുന്നു. പിന്നീട് എയ്ഡ്പോസ്റ്റ് അടഞ്ഞ നിലയിലായിരുന്നു. കഴിഞ്ഞ ഞായറാഴ്ച്ച രാത്രിയിൽ അത്യാഹിത വിഭാഗത്തിനു മുന്നിൽ ഗുണ്ടാസംഘം ആക്രമണം നടത്തിയിരുന്നു. അടിപിടിക്കേസിൽ പരുക്കേ​റ്റ് ചികിത്സ തേടിയെത്തിയ 2 പേരെ ലക്ഷ്യമിട്ടാണ് മൂന്നംഗ ഗുണ്ടാ സംഘം എത്തിയത്. ആശുപത്രി ഉപകരണങ്ങൾ തകർക്കുകയും വനിതാ ഡോക്ടറെയും ജീവനക്കാരെയും കയ്യേ​റ്റം ചെയ്യാൻ ശ്രമിക്കുകയും അസഭ്യം വിളിക്കുകയും ഭീഷണിപ്പെടുത്തുകയും ചെയ്തിരുന്നു. ഇതിലെ പ്രധാനി അന്ധകാരനഴി കാട്ടുങ്കൽത്തയ്യിൽ സിബിനെ പൊലീസ് പിടികൂടി. മ​റ്റു രണ്ടുപേർക്കായി തിരച്ചിൽ നടക്കുകയാണ്. തിങ്കളാഴ്ച്ച ആശുപത്രിയിലെ പി.ആർ.ഒ രാജീവ് മുരളിയേയും മ​റ്റൊരു സംഘം കയ്യേ​റ്റം ചെയ്തു.