അമ്പലപ്പുഴ: പാഠ്യപദ്ധതി പരിഷ്കരണത്തിന്റെ പ്രവർത്തനങ്ങൾ ആരംഭിച്ചതായി മന്ത്രി വി. ശിവൻകുട്ടി പറഞ്ഞു. ഹയർ സെക്കൻഡറി പരീക്ഷയിൽ നൂറുമേനി വിജയം നേടിയ അമ്പലപ്പുഴ കെ.കെ.കുഞ്ചു പിള്ള സ്മാരക സ്കൂളിലെത്തി വിദ്യാർത്ഥികളെയും അദ്ധ്യാപകരെയും അനുമോദിച്ച ശേഷം സംസാരിക്കുകയായിരുന്നു മന്ത്രി. ദേശീയ നിലവാരത്തിലും, സാർവ്വദേശീയ നിലവാരത്തിലുമുള്ള വിഷയങ്ങൾ പാഠപുസ്തകത്തിൽ ഉൾപ്പെടുത്തും. സാമൂഹിക പ്രതിബദ്ധത, ഭരണഘടനാ മൂല്യങ്ങൾ, കൃഷി, സംസ്കാരം, ഭാഷ തുടങ്ങിയവയും ഉൾപ്പെടുത്തും. പാഠപുസ്തകം പൂർണരൂപത്തിൽ എത്തിക്കഴിഞ്ഞാൽ പൊതുജനങ്ങൾക്ക് അഭിപ്രായം പറയാൻ ഓരോ സ്കൂളിലും ഇത് ചർച്ച ചെയ്യുന്നതിന് വേണ്ടിയുള്ള അവസരമൊരുക്കും. എസ്.എസ്.എൽ.സി വിജയിച്ച എല്ലാ വിദ്യാർത്ഥികൾക്കും ഉപരി പഠനം ഉറപ്പാക്കുമെന്നും മന്ത്രി പറഞ്ഞു.