 സ്കൂളിലെത്താൻ മെട്രോ യാത്ര മുതൽ 6 പദ്ധതികൾ

 പൂർവവിദ്യാർത്ഥികളുടെ സമ്മാനം

കൊച്ചി: കൊച്ചി നഗരത്തിന്റെ ഹൃദയത്തിൽ 117 വർഷമായി തലയെടുപ്പോടെ നിൽക്കുന്ന സ്കൂൾ - എസ്.ആർ.വി. പേരും പെരുമയും വാനോളം! പക്ഷേ,​ പഠിക്കാൻ വിദ്യാർത്ഥികൾ കുറവ്. ഈ സങ്കടംമാറ്റി സ്കൂളിന്റെ പഴയപ്രതാപം വീണ്ടെടുക്കാൻ കച്ചകെട്ടുകയാണ് പൂർവവിദ്യാർത്ഥി കൂട്ടായ്മ.

ആറോളം പദ്ധതികൾ ഇവർ ആവിഷ്കരിച്ചുകഴിഞ്ഞു. ഇതിലൊന്നാണ് ഈ അദ്ധ്യയനവർഷം മുതൽ കുട്ടികൾക്ക് കൊച്ചി മെട്രോയിൽ സൗജന്യയാത്ര. രാവിലെയും വൈകിട്ടും മെട്രോയിലേറി സ്കൂളിലെത്താം. കൊച്ചി മെട്രോയുമായി സഹകരിച്ചാണ് പദ്ധതി. കൺസഷൻ ഇളവ് കഴിഞ്ഞ് ശേഷിക്കുന്ന തുക പൂർവവിദ്യാർത്ഥി കൂട്ടായ്മ വഹിക്കും.

നിലവിൽ 600ലധികം കുട്ടികളാണ് എസ്.ആർ.വി സ്കൂളിലുള്ളത്. കേന്ദ്ര-സംസ്ഥാന സർക്കാരുകളിൽ ഉന്നതപദവികളിലും നീതിന്യായരംഗം മുതൽ രാഷ്ട്രീയത്തിൽ വരെയും പ്രവർത്തിക്കുന്ന എസ്.ആ‌‌‌ർ.വി പൂർവവിദ്യാർത്ഥി കൂട്ടായ്മയിൽ.

ഉച്ചഭക്ഷണവും സ്പോർട്സും

പൂർവവിദ്യാർത്ഥി കൂട്ടായ്മ ആവിഷ്‌കരിച്ച മറ്റ് പദ്ധതികൾ:

• എല്ലാവർക്കും ഉച്ചഭക്ഷണം: ഒന്നുമുതൽ ഹയർ സെക്കൻഡറി വിദ്യാർത്ഥികൾക്ക് പോഷക സമൃദ്ധമായ ഉച്ചഭക്ഷണം. ആഴ്ചയിൽ ഒരിക്കൽ മത്സ്യമാംസം.

• സൗജന്യ പുസ്തക വിതരണം: സ്കൂളിൽ പ്രവേശനം നേടിയ കുട്ടികൾക്കെല്ലാം നോട്ട് ബുക്കുൾപ്പെടെ നൽകും.

• സ്പോർട്സ് കോച്ചിംഗ്: ഫുട്ബാൾ, ക്രിക്കറ്റ്, ബാസ്കറ്റ് ബാൾ, ബാഡ്മിന്റൺ,​ വോളിബാൾ, ടെന്നിസ്, ചെസ്സ് എന്നിവയ്ക്ക് പ്രത്യേക കോച്ചുമാരുടെ സൗജന്യ പരിശീലനം.

• കലാപഠനം: കുട്ടികൾക്ക് സൗ‌ജന്യ നൃത്ത, ചിത്രരചനാ പരിശീലനം.

• വ്യക്തിത്വ വികസനക്ലാസ്: പൂർവവിദ്യാർത്ഥികളായ ഉന്നത ഉദ്യോഗസ്ഥരുൾപ്പെടുന്നവർ നേതൃത്വം നൽകും. ആഴ്ചയിൽ ഒരിക്കൽ ക്ലാസ്.

''സ്കൂളിലെ അടിസ്ഥാന സൗകര്യങ്ങൾ ഉന്നത നിലവാരത്തിലേക്ക് ഉയ‌‌‌‌ർത്തുകയാണ് ലക്ഷ്യം. ഇതുവഴി വിദ്യാർത്ഥികളുടെ എണ്ണം വർദ്ധിക്കുമെന്നാണ് പ്രതീക്ഷ""

ബി.ആ‌‌ർ.അജിത്,​

പ്രസിഡന്റ്,​

എസ്.ആർ.വി ഒ.എസ്.എ

''കൊച്ചി കോർപ്പറേഷനിൽ നിന്ന് എസ്.ആർ.വി സ്കൂളിലെ അടിസ്ഥാനവികസനത്തിനായി ഫണ്ട് ഉറപ്പാക്കും. മേയറുമായി ഇക്കാര്യം സംസാരിച്ചു""

പത്മജ എസ്.മേനോൻ,​

കൗൺസിലർ,​

കൊച്ചി കോർപ്പറേഷൻ

''ഇത്തരം മികച്ച പദ്ധതികൾ നടപ്പാക്കുന്നതിലൂടെ കൂടുതൽ വിദ്യാർത്ഥികൾ എസ്.ആർ.വിയിൽ എത്തുമെന്നാണ് പ്രതീക്ഷ""

മാധുരി ദേവി,​

പ്രധാന അദ്ധ്യാപിക,​

എസ്.ആർ.വി യു.പി.എസ്