മൂവാറ്റുപുഴ: ദേശീയ പഞ്ചഗുസ്തി മത്സരത്തിൽ വിജയിച്ച് മൂവാറ്റുപുഴയുടെ അഭിമാനമായി മധു മാധവൻ. ഹൈദരാബാദിൽ അവസാനിച്ച 44-ാമത് ദേശീയ പഞ്ചഗുസ്തി മത്സരത്തിൽ എഴുപതു കിലോ വിഭാഗത്തിൽ ഇടതും വലതും ഒന്നാമതായി വിജയിച്ചാണ് ലോക ചാമ്പ്യൻഷിപ്പിന് മധു അർഹത നേടിയത്.

അടുത്ത സെപ്തംബറിൽ തുർക്കിയിൽ നടക്കുന്ന ലോക ചാമ്പ്യൻഷിപ്പിൽ പങ്കെടുക്കാനുള്ള ഒരുക്കത്തിലാണ്. കാവന ഇടക്കുടിയിൽ മധു. 1991 മുതൽ പഞ്ചഗുസ്തി മത്സര രംഗത്ത് സജീവമാണ് മധു. ചാലക്കുടിയിൽ നടന്ന ദേശീയ ചാമ്പ്യൻഷിപ്പിൽ മൂന്നാം സ്ഥാനം നേടിയിരുന്നു.

2013 മുതൽ പങ്കെടുത്ത എല്ലാ ദേശീയ മത്സരങ്ങളിലും ഒന്നാം സ്ഥാനം നേടിയിട്ടുണ്ട് 44 കാരനായ ഇദ്ദേഹം. 2019 ൽ റൊമാനിയയിൽ നടന്ന ലോക ചാമ്പ്യൻഷിപ്പിൽ വലതു കൈ വിഭാഗത്തിൽ 14-ാം സ്ഥാനവും ഇടതു കൈ വിഭാഗത്തിൽ ആറാം സ്ഥാനവും നേടിയിരുന്നു.

മക്കളായ അഭിജിത് (22), അനുജിത് (19) എന്നിവരും പിതാവിന്റെ പാതയിലുണ്ട്. 2018ൽ നടന്ന സംസ്ഥാന മത്സരത്തിൽ അഭിജിത്തിനും ജില്ലാതല മത്സരത്തിൽ അനുജിത്തിനും ഒന്നാം സ്ഥാനം ലഭിച്ചിട്ടുണ്ട്. പിതാവ് മധുവിനൊപ്പം ഹൈദരാബാദിൽ നടന്ന മത്സരത്തിൽ യുവജന വിഭാഗത്തിൽ അനുജിത്ത് പങ്കെടുത്തെങ്കിലും മുൻ നിരയിലെത്താൻ കഴിഞ്ഞിട്ടില്ല.

എല്ലാ വർഷവും വിവിധ ലോകരാജ്യങ്ങളിൽ നടക്കുന്ന മത്സരങ്ങളിൽ പങ്കെടുക്കാൻ അർഹത നേടുന്നുണ്ടെങ്കിലും സാമ്പത്തിക പ്രതിസന്ധി മൂലം പലപ്പോഴും പങ്കെടുക്കാൻ കഴിയാറില്ലെന്ന് മധു പറഞ്ഞു. 2019 ലെ റുമാനിയ മത്സരത്തിലാണ് ഒടുവിൽ പങ്കെടുത്തത്. തുർക്കിയിലെ ലോക ചാമ്പ്യൻ ഷിപ്പിലും ഏഷ്യൻ ചാമ്പ്യൻഷിപ്പിലും പങ്കെടുക്കാൻ സാമ്പത്തിക സഹായം തേടുകയാണ് ഈ കായിക പ്രതിഭ.