നെടുമ്പാശ്ശേരി : സ്വന്തം വിശ്വാസത്തിൽ ഉറച്ചുനിൽക്കുമ്പോൾ തന്നെ മറ്റുള്ളവരുടെ വിശ്വാസങ്ങളെ ആദരിക്കുവാൻ കഴിയുന്നവരാണ് യഥാർത്ഥ മതേതര വിശ്വാസികളെന്ന് മുൻമുഖ്യമന്ത്രി ഉമ്മൻ ചാണ്ടി പറഞ്ഞു. നെടുമ്പാശ്ശേരി ഹജ്ജ് ക്യാമ്പിൽ തീർത്ഥാടകർക്ക് യാത്രാ മംഗളങ്ങൾ നേർന്ന് സംസാരിക്കുകയായിരുന്നു അദ്ദേഹം.

നാം പാരമ്പര്യമായി പിന്തുടർന്ന് വന്ന സംസ്കാരങ്ങളെ തകർക്കാൻ ചിലർ ബോധപൂർവ്വം ശ്രമം നടത്തുകയാണെന്നും അദ്ദേഹം പറഞ്ഞു. 2015 ൽ താൻ മുഖ്യമന്ത്രിയായിരുന്നപ്പോഴാണ് ആദ്യമായി നെടുമ്പാശേരിയിൽ ഹജ്ജ് ക്യാമ്പിന് സൗകര്യം ഒരുക്കിയത്. അതേ തുടർന്ന് വരുന്നതിൽ സന്തോഷമുണ്ടെന്നും അദ്ദേഹം പറഞ്ഞു. സംസ്ഥാന ഹജ്ജ് കമ്മിറ്റി ചെയർമാൻ സി. മുഹമ്മദ് ഫൈസി, ബെന്നി ബഹ്നാൻ എം.പി, സി.പി.എം പോളിറ്റ്ബ്യൂറോ അംഗം എം.എ. ബേബി, എം.എൽ.എമാരായ അൻവർ സാദത്ത്, റോജി എം. ജോൺ, കേന്ദ്ര ഹജ്ജ് കമ്മിറ്റി ചെയർമാൻ അബ്ദുള്ളകുട്ടി, കെപി.സി.സി ജനറൽ സെക്രട്ടറി അഡ്വ. ബി.എ. അബ്ദുൾ മുത്തലിബ്, ഹജ്ജ് സെൽ ഓഫീസർ എസ്. നജീബ്, മുൻ എം.എൽ.എ എ.എം. യൂസഫ്, അഡ്വ. പി.ബി. സുനീർ, നൗഷാദ് മേത്തർ, കെ.ടി. കുഞ്ഞുമോൻ , തൊടിയൂർ മുഹമ്മദ്കുഞ്ഞ് മൗലവി, അനസ് ഹാജി തുടങ്ങിയവർ ആശംസകൾ നേർന്നു.