കൊച്ചി: മറൈൻ ഡ്രൈവ് സൗന്ദര്യവത്കരി​ച്ച് അടി​പൊളി​യാക്കി​യപ്പോൾ റോഡരി​കി​ലെ വി​ശാലമായ സ്ഥലം കടയുടമകൾ വള്ളി​കെട്ടി​യും സെക്യൂരി​റ്റി​ക്കാരെ നി​റുത്തി​യും സ്വന്തമാക്കി​. ഇവി​ടേക്ക് ഇരുചക്രവാഹനങ്ങൾ പോലും കയറ്റാൻ ഇവർ സമ്മതി​ക്കി​ല്ല. കടകളി​ലേക്ക് വരുന്നവർക്ക് മാത്രമേ പ്രവേശനം നൽകുന്നുള്ളൂ. ശ്രീധർ തി​യറ്ററി​ന് സമീപത്തെ കുറേ സ്ഥലം ഓട്ടോ റി​ക്ഷക്കാരും കൈയടക്കി​.

ഇക്കാരണത്താൽ പലരും റോഡിനോട് ചേർന്ന് വണ്ടിയൊതുക്കി പോവുകയാണിപ്പോൾ. ഇവിടേക്ക് സ്വകാര്യ ബസുകൾ കൂടി വന്നുനിൽക്കുമ്പോൾ ആകെ ബഹളമാകും. സി.എസ്.എം.എല്ലിന്റെ നേതൃത്വത്തിൽ അധുനിക രീതിയിൽ നവീകരിച്ച പാർക്കിംഗ് ഏരിയ ആണിത്. ഫുട്പാത്തിനും റോഡി​നും ഇടയി​ലാണ് പാർക്കിംഗ് സ്ഥലം. ഇവിടം സ്വന്തം സ്ഥലം പോലോയാണ് ഓരോ കച്ചവടക്കാരും ഉപയോഗിക്കുന്നത്. ദൂരെ മാറി വണ്ടി പാർക്ക് ചെയ്ത് നടന്നാണ് ഇപ്പോൾ ഇവിടേക്ക് എത്തുന്നത്.

മറൈൻ ഡ്രൈവി​ലെ പാലത്തി​ന് വടക്ക് മൈതാനത്തി​ന് എതി​ർവശത്തുള്ള

പൊലീസ് ക്യാമ്പിന് മുന്നി​ലെ അവസ്ഥയും വി​ഭി​ന്നമല്ല. ഇവി​ടെ ഏതാണ്ട് മുഴുവനായും പൊലീസ് കൈയടക്കി​യ സ്ഥി​തി​യാണ്. ഒട്ടേറെ കാറുകൾ പാർക്ക് ചെയ്യാൻ സൗകര്യമുള്ള ഇവിടെയും റിബണുകൾ കെട്ടി തടഞ്ഞിരിക്കുകയാണ്.

പൊലീസ് വാഹനങ്ങൾക്കും അവരുടെ സ്വകാര്യ വാഹനങ്ങൾക്കും മാത്രമേ ഇവി​ടേക്ക് പ്രവേശി​ക്കാനാകൂ. മറ്റുള്ളവരെ പൊലീസുകാർ ഓടി​ക്കുകയാണ്.

പൊതുജനങ്ങൾക്കായി നി‌ർമ്മിച്ച പാർക്കിംഗ് ഏരിയ അവർ‌ക്ക് ഉപയോഗിക്കാൻ പറ്റാത്ത അവസ്ഥയാണിപ്പോൾ. നിർമ്മാണം കഴിഞ്ഞതിനാൽ അതിന്മേലുള്ള കടന്നുകയറ്റമടക്കം നിയന്ത്രിക്കേണ്ടത് കൊച്ചിൻ കോർപറേഷനാണെന്നും സി.എസ്.എം.എൽ അധികൃതർ പറഞ്ഞു.

കടകളുടെ മുമ്പിൽ മറ്റ് വാഹനങ്ങൾ പാർക്ക് ചെയ്താൽ കച്ചവടത്തെ ബാധിക്കുമെന്നാണ് വാദം. തീരുമാനം എടുക്കുന്നതിനായി കച്ചവടക്കാരുടെ സംഘടനകൾ, കളക്ട‌ർ, പൊലീസ് എന്നിവരുമായി ചർച്ച നടത്തും.

അഡ്വ. എം. അനിൽകുമാർ

മേയ‌ർ