സ്വാഭാവിക പരിണാമത്തിലൂടെ വന്ന പുതിയ അഞ്ചാം തലമുറ ആഗോള വയർലെസ് സ്റ്റാൻഡേർഡാണ് 5 ജി​. ഒന്നാം തലമുറ നെറ്റ്‌വർക്ക് അനലോഗ് വോയ്സ് വിതരണം ചെയ്തപ്പോൾ 2 ജി​,​ ഡിജിറ്റൽ ശബ്ദം അവതരിപ്പിച്ചു. മൊബൈൽ ഡാറ്റാ സേവനങ്ങളുമായി​ 3ജി​ വന്നപ്പോൾ 4ജി​ LTE മൊബൈൽ ബ്രോഡ്‌ബാൻഡ് യുഗത്തിന് തുടക്കമിടുകയാണ് ചെയ്തത്.

ഉപയോക്താക്കളെ മാത്രമല്ല,​ യന്ത്രങ്ങളും ഉപകരണങ്ങളും ഉൾപ്പെടെ എല്ലാറ്റിനെയും ഒരുമിപ്പിക്കുന്ന വിധത്തിലുള്ള രൂപകല്പനയാണ് 5ജി​ നെറ്റ്‌വർക്കി​ന്. ഉപയോക്താക്കളെ സംബന്ധിച്ച് നേരത്തേ ലഭ്യമായിരുന്നതിലും കൂടുതൽ കണക്ടിവിറ്റി, ഉയർന്ന ഡാറ്റാ സ്പീഡ്, അൾട്രാ ലോ ലേറ്റൻസി, കൂടുതൽ വിശ്വാസ്യത, ഉയർന്ന പ്രകടനം, മെച്ചപ്പെട്ട കാര്യക്ഷമത എന്നി​വ 5ജി​ വാഗ്ദാനം ചെയ്യുന്നു.

അതിവേഗ

അനുഭവം

വരാനിരിക്കുന്ന നിരവധി മൊബൈൽ ആപ്ലിക്കേഷനുകൾ അമ്പരപ്പിക്കും വിധം ഈ രംഗം മാറ്റിമറിക്കാൻ പോവുകയാണ്. മെച്ചപ്പെടുത്തിയ മൊബൈൽ ബ്രോഡ്‌ബാൻഡ്, മിഷൻ- ക്രിട്ടിക്കൽ കമ്മ്യൂണിക്കേഷൻസ്, ഇന്റർനെറ്റ് ഒഫ് തിംഗ്സ് എന്നിവ ഉൾപ്പെടെ മൂന്ന് പ്രധാനതരം കണക്റ്റഡ് സേവനങ്ങളിൽ 5ജി​ ഉപയോഗിക്കുന്നുണ്ട്. വിശാലമായി പറഞ്ഞാൽ ഉയർന്ന ഡൗൺലോഡ് വേഗത, ഞൊടിയിടയിൽ കണക്ടിവിറ്റി, കോടിക്കണക്കിന് ഉപകരണങ്ങൾക്ക് കൂടുതൽ ശേഷിയും കണക്ടിവിറ്റിയും നൽകുന്നതുൾപ്പെടെ, മനുഷ്യജീവിതത്തെ മാറ്റിമറിക്കുന്ന വിവിധ കാര്യങ്ങൾ ഒരേസമയം നിർവഹിക്കത്തക്ക വിധത്തിലാണ് 5ജി​ രൂപകല്പന ചെയ്തിരിക്കുന്നത്.

വെർച്വൽ റിയാലിറ്റി (VR), ഓഗ്‌മെന്റഡ് റിയാലിറ്റി (AR), ഇന്റർനെറ്റ് ഒഫ് തിങ്സ് (IoT) എന്നിവ പോലുള്ള പുതിയ അനുഭവങ്ങൾ ലഭ്യമാക്കാൻ 5ജി​ മൊബൈൽ സാങ്കേതികവിദ്യയ്ക്കു കഴിയും. കൂടാതെ കൃത്രിമ ബുദ്ധി (ആർ

ട്ടിഫിഷ്യൽ ഇന്റലിജൻസ്)​ ഉൾപ്പെടുത്തി​യ ക്ലൗഡ് സേവനങ്ങളിലേക്കുള്ള തൽക്ഷണ ആക്‌സസ്, മൾട്ടിപ്ലെയർ ക്ലൗഡ് ഗെയിമിംഗ്, ഓഗ്‌മെന്റഡ് റിയാലിറ്റിയുള്ള ഷോപ്പിംഗ്, തത്സമയ വീഡിയോ വിവർത്തനവും സഹകരണവും എന്നിവയും മറ്റുമായി ഒട്ടനവധി പുതിയതും മെച്ചപ്പെട്ടതുമായ സേവനങ്ങൾ 5ജി അവതരിപ്പിക്കുന്നു.

വിനോദങ്ങളുടെ

വിസ്ഫോടനം

വീഡിയോ ട്രാഫിക്കിൽ സ്‌ഫോടനാത്മകമായ വളർച്ചയാണ് 5ജി-യിലൂടെ എത്തുക. മൊബൈൽ ഫോണുകൾ കൂടുതലായി മീഡിയയുടെയും വിനോദത്തിന്റെയും ഇടമായി മാറും. സദാ കണക്‌ടഡ് ആയിരിക്കുന്നതു വഴി ക്ലൗഡ് കമ്പ്യൂട്ടിംഗ് അനുഭവങ്ങൾ വേറെ. കുറഞ്ഞ ലേറ്റൻസി ലിങ്കുകൾ ഉപയോഗിച്ച് വ്യവസായങ്ങളെ പരിവർത്തനം ചെയ്യാൻ കഴിയുന്ന പുതിയ സേവനങ്ങളിലേക്കും ഇത് വഴി​തുറക്കും.

സമ്പദ്‌വ്യവസ്ഥയിൽ പൂർണമായ 5ജി​ പ്രഭാവം എന്താകുമെന്ന് വരുംകാലം തെളിയിക്കേണ്ട കാര്യമാണ്. ഉയർന്ന ആവശ്യകതകൾ അടിസ്ഥാനമാക്കി 20 ജി​.ബി​.പി​.എസ് വരെ പരമാവധി ഡാറ്റാ സ്പീഡ് നൽകാനും മി​ല്ലി​മീറ്റർ വേവ് പോലുള്ള പുതിയ സ്പെക്‌ട്രത്തിലേക്കു വികസിപ്പിച്ച് കൂടുതൽ നെറ്റ്‌വർക്ക് കപ്പാസിറ്റിക്കും വേണ്ടി​യാണ് 5ജി​യുടെ രൂപകല്പന. 4ജി​ LTE പോലെ, 5ജി​യും ഓർത്തോഗണൽ ഫ്രീക്വൻസി ഡിവിഷൻ മൾട്ടിപ്ലക്‌സിംഗ് (OFDM) അധി​ഷ്ഠി​തമാണ്. അതേ മൊബൈൽ നെറ്റ്‌വർക്കിംഗ് തത്വങ്ങളെ അടിസ്ഥാനമാക്കിയാണ് പ്രവർത്തനമെങ്കിലും 5ജി​യുടെ സവിശേഷതയായ എൻആർ (ന്യൂ റേഡിയോ) എയർ ഇന്റർഫേസ്,​ ഉയർന്ന അളവിലുള്ള വഴക്കവും സ്കേലബിലിറ്റിയും നൽകും. വയർലെസ് മോഡത്തി​ലൂടെ 5ജി​ക്ക് ഹോം ഇന്റർനെറ്റ് സേവനങ്ങളെ മാറ്റിമറിക്കാനാകും.

5ജി ഫോണുകൾ ഇതിനകം തന്നെ ലഭ്യമാണെങ്കിലും വലിയ വിലകൊടുത്ത് ഇപ്പോൾ വാങ്ങുന്നതിനു പകരം കാത്തിരിക്കുന്നതാണ് നല്ലത്. 5ജി​ റോൾഔട്ട് ടൈംലൈൻ പുരോഗമിക്കുമ്പോൾ, 5ജി​ സാങ്കേതികവിദ്യ ഉപയോഗിക്കുന്ന ഉപകരണങ്ങളും കൂടുതൽ പ്രചാരത്തി​ലാകും. മി​കച്ച സ്മാർട്ട്ഫോണുകളും കാരിയർ സബ്സ്ക്രിപ്ഷനുകളും ലഭ്യമാകും. 4 ജി സിം വഴി 5 ജി സേവനങ്ങൾ ലഭ്യമാകുമെങ്കിലും പൂർണതയ്ക്കായി​ 5ജി സിമ്മിലേക്ക് ഉപയോക്താക്കൾ മാറേണ്ടിവരും. 5ജി​ റേഡി​യോ തരംഗങ്ങളുടെ പ്രത്യേകത മൂലം നി​ലവി​ലുള്ള വലി​യ മൊബൈൽ ടവറുകൾ കൂടാതെ കവറേജി​നായി​ വ്യാപകമായി​ ചെറി​യ ടവറുകളും സ്ഥാപി​ക്കേണ്ടി വരും. 5G സേവനങ്ങൾക്ക് ഉയർന്ന നി​രക്ക് നൽകേണ്ടി​ വരുമെന്നതും മറക്കരുത്.

വഴി തുറന്നത്

ദക്ഷിണ കൊറിയ

ഇന്ന് പത്തോളം രാജ്യങ്ങളിലെ 1200-ലധികം നഗരങ്ങളി​ൽ 5ജി സേവനം ലഭ്യമാണ്. ദക്ഷിണ കൊറിയയാണ് രാജ്യവ്യാപകമായി 5ജി​ നെറ്റ്‌വർക്ക് ആരംഭിക്കുകയും 5ജി​ സേവനങ്ങൾ വാണിജ്യവത്കരിക്കുകയും ചെയ്ത ആദ്യ രാജ്യം. 5ജി​ വികസിപ്പിക്കുന്നതിൽ കൊറിയൻ സർക്കാർ പ്രധാന പങ്ക് വഹിച്ചിട്ടുണ്ട്. 5ജി​ വിന്യാസവും വാണിജ്യവത്കരണവും എങ്ങനെ നടത്താം എന്നതിനെക്കുറിച്ചുള്ള വിശദമായ സമയപദ്ധതി അവർ രൂപീകരിച്ചു. കമ്പനികൾ, ഗവേഷണ സ്ഥാപനങ്ങൾ, അക്കാഡമികൾ എന്നി​വയുടെ സഹകരണത്തി​നും സൗകര്യമൊരുക്കി. 5ജി​ ഉപകരണങ്ങൾ, ആപ്ലിക്കേഷനുകൾ എന്നിവയുടെ ഗവേഷണത്തി​ന് ശക്തമായ പ്രോത്സാഹനമേകി​. ഈ ചുവടുപിടിച്ചാണ് ഇന്ത്യയിൽ 4ജിയും 5ജിയും തദ്ദേശീയമായി വികസിപ്പിച്ചത്.

അടുത്ത വർഷം മാർച്ചോടെ ഇന്ത്യയിൽ സമ്പൂർണ 5ജി​ സേവനങ്ങൾ ലഭിക്കുമെന്ന് കേന്ദ്ര വാർത്താവിനിമയ മന്ത്രി അശ്വിനി വൈഷ്ണവ് ഇക്കഴിഞ്ഞ വിവ ടെക്‌നോളജി ഇവന്റിൽ പറഞ്ഞി​രുന്നു. സ്പെക്ട്രം ലേലം ജൂലായ് അവസാനത്തോടെ പൂർത്തിയാകും. ഡാറ്റാ പ്രൈവസി പ്രശ്നങ്ങൾ തരണം ചെയ്യാൻ ഇന്ത്യ തദ്ദേശീയമായി നിർമ്മിച്ച ഉപകരണങ്ങളും സോഫ്ട് സ്റ്റാക്കുമാണ്‌ 5ജിയിൽ ഉപയോഗിക്കാനിരിക്കുന്നത്.

(കൊച്ചി​ ശാസ്ത്ര- സാങ്കേതിക സർവകലാശാലയിലെ കമ്പ്യൂട്ടർ സയൻസ് വിഭാഗം പ്രൊഫസർ ആണ് ലേഖകൻ. ഫോൺ​: 94473 05879)​