മൂവാറ്റുപുഴ: ലോഡ്ജിൽ മോഷണം നടത്തിയ പ്രതി അറസ്റ്റിൽ. കോഴിക്കോട് കൊയിലാണ്ടി നെച്ചാട് മണ്ണാറത്തുവീട്ടിൽ ജംഷീദ് (33) നെയാണ് വാഴക്കുളം പൊലീസ് അറസ്റ്റ് ചെയ്തത്. ഇയാൾ രണ്ട് മാസം മുമ്പ് വാഴക്കുളം എം.സി ലോഡ്ജിലെ മുറിയിൽനിന്ന് 85,000 രൂപയും മുൻവശത്ത് പാർക്ക് ചെയ്തിരുന്ന പിക്കപ്പ് ട്രക്കും മോഷ്ടിച്ചുകൊണ്ടുപോവുകയായിരുന്നു. മോഷണത്തിന് ശേഷം ഒളിവിൽ പോയ ഇയാളെ പ്രത്യേകസംഘം രൂപീകരിച്ച് നടത്തിയ അന്വേഷണത്തിൽ കോഴിക്കോട് പേരാമ്പ്രയിൽ നിന്നാണ് പിടികൂടിയത്. ഇൻസ്പെക്ടർ എസ്.സതീഷ് കുമാർ, സബ് ഇൻസ്പെക്ടർ എം.എ.ഷക്കീർ,എ.എസ്.ഐ എൻ.എൻ.സജീവൻ, സീനിയർ സിവിൽ പൊലീസ് ഓഫീസർമാരായ റെജി, വർഗ്ഗീസ്.ടി.വേണാട്ട് എന്നിവരാണ് അന്വേഷണസംഘത്തിൽ ഉണ്ടായിരുന്നത്.